काठमाण्डौं । नेपाल राष्ट्र बैंकको थापाथली शाखाले ३ दिनमै सर्वसाधारणलाई १ अर्ब ३० करोड रुपैयाँ नयाँ नोट बाँडेको छ । आगामी शुक्रबारसम्म सर्वसाधारणलाई नयाँ नोट बाँडिने राष्ट्र बैंकले जनाएकोछ ।
गत आइतबारदेखि राष्ट्र बैंकले सर्वसाधारणलाई नयाँ नोट बाँड्न थालेको थियो । बैंकको थापाथली शाखाबाट मात्रै ३ दिनमा १ अर्ब ३० करोड नयाँ नोट बाँडिएको हो । राष्ट्र बैंकले यसअघिनै बैंक तथा वित्तीय संस्थाहरुलाई नयाँ नोट वितरण गरिसकेको छ भने उपत्यका बाहिरका आफ्ना पाँचवटा क्षेत्रीय कार्यालय मार्फत पनि सर्वसाधारणलाई सीधै नयाँ नोट वितरण गरिरहेको छ ।
राष्ट्र बैंकको थापाथली शाखाबाट आइतबार ३० करोड, सोमबार ४५ करोड रुपैयाँ नयाँ नोट सर्वसाधारणलाई बाँडिएको थियो भने र मंगलबार ५० करोड रुपैयाँको हाराहारीमा बाँडिएको हो ।
बैंक तथा वित्तीय संस्थाहरुले आफ्ना कर्मचारी, कर्मचारीका निकट मान्छे, पहुँचवाला मान्छे र बैंकका ठूला ग्राहकलाई मात्रै नयाँ नोट दिएपछि राष्ट्र बैंकमा सर्वसाधारणको ठूलो लाइन लागेको छ । नयाँ नोट साट्न राष्ट्र बैंकमा सर्वसाधारणहरु ५÷६ घण्टासम्म लाइन बसेका छन् ।
१९ असोज २०७३, ११।००
वि.सं.२०७३ असोज १९ बुधवार १२:४२ मा प्रकाशित
