चितवन। पूर्वमन्त्री माधवप्रसाद घिमिरेसहित तीन जना त्रिशूली नदीमा बेपत्ता भएपछि सरकारले गठन गरेको छानबिन समितिले घोप्टेभिरबाट स्थलगत अध्ययन थालेको छ ।
सशस्त्र प्रहरी विपत् व्यवस्थापन तालिम केन्द्र कुरिनटारका प्रहरी उपरीक्षक गणेशबहादुर थापाका अनुसार समितिका सदस्यले बिहिबार बिहान १०ः३० बजेदेखि स्थलगत रुपमा काम थालेको छ ।
पूर्वप्रहरी महानिरीक्षक कुबेरसिंह राना संयोजक तथा सदस्यमा सशस्त्र प्रहरीका अतिरिक्त महानिरीक्षक प्रेमकुमार शाही, नेपाल प्रहरीका नायब महानिरीक्षक पङ्कज श्रेष्ठ, सडक विभागका उपमहानिर्देशक उमाकान्त झा र इन्जिनियर मधुसूदन साँखीको समितिले घटनास्थलमा सडकको अवस्था, दुर्घटनाका कारण, उद्धार र खोजी लगायत विषयमा अध्ययन गर्नेछ ।
यही असोज ९ गते काठमाडौँ तर्फ जाँदै गर्दा घिमिरे सवार गाडी पृथ्वी राजमार्गको घोप्टेभिरबाट त्रिशूलीमा खसेको थियो ।
दुर्घटनामा परी पूर्वगृह तथा परराष्ट्रमन्त्री सहित दुई भाइ नदीमा बेपत्ता छन् भने उनका आमासहित तीन जनाको मृत्यु भएको छ । घाइते चालकको काठमाडौँमा उपचार भइरहेको छ । घिमिरे र उनका भाइको खोजी कार्य जारी रहे पनि गाडी र बेपत्ता व्यक्तिलाई अझैसम्म फेला पार्न सकिएको छैन ।
प्रकाशित मितिः २०७३ असोज २०
वि.सं.२०७३ असोज २० बिहीवार १९:०५ मा प्रकाशित
