काठमाण्डौं । गैरआवासीय नेपाली (एनआरएन)ले पनि नेपालको सेयर बजारमा अब सिधै लगानी गर्न पाउने भएका छन् । गैरआवासीय नेपालीलाई नेपालको धितोपत्रको दोस्रो बजारमा सिधै लगानी गर्न पाउने गरी ब्यवस्था गर्ने कार्यबिधि बनाउननेपाल धितोपत्र बोर्डले समिति गठन गरेको छ ।
धितोपत्र बोर्डले बुधबार जारी गरेको प्रेस बिज्ञप्तिमा एनआरएनलाई प्रत्यक्ष रुपमा सहभागी गराउने कार्यविधिको मस्यौदा तयार गरी सिफारिस गर्न बोर्डका नियमन तथा व्यवस्थापन विभागका कार्यकारी निर्देशकको संयोजकत्वमा बोर्ड, अर्थमन्त्रालय, नेपाल राष्ट्र वैंक र नेप्सेका पदाधिकारीहरु सदस्य रहने गरी एक समिति गठन गरिएको उल्लेख छ । उक्त समितिमा एनआरएनको प्रतिनिधि समेत सहभागिता रहने व्यवस्था गरिएको र समितिले दुई महिना भित्र कार्यबिधि तयार गर्ने गरी तोकिएको बोर्डले जनाएको छ ।
गैरआबासीय नेपालीहरुले आफुहरुलाई प्रत्यक्ष रुपमा लगानी गर्ने वातावरण मिलाउन लामो समयदेखि माग गर्दै आएका थिए । गैरआवासीय नेपालीको लगानी भित्र्याउने नीतिगत ब्यवस्था सरकारले पहिल्यै गरिसकेको भए पनि त्यस सम्बन्धी कार्यबिधि नबन्दा उनीहरुले सेयर बजारमा प्रत्यक्ष रुपमा लगानी गर्न पाएका थिएनन् ।
३ कार्तिक २०७३, १२।००
वि.सं.२०७३ कात्तिक ३ बुधवार १३:०० मा प्रकाशित
