काठमाण्डौं । सनराइज बैंकले चालु आर्थिक बर्षको पहिलो क्वार्टरमा सतप्रतिशत भन्दा बढी खुद मुनाफा बृद्धि गरेको छ। बैंकले चालु आवको पहिलो त्रैमासिकमा २५ करोड ३१ लाख १६ हजार रुपैयाँ मुनाफा आर्जन गरेको हो। गत आवको यहि अवधिमा बैंकको नाफा ११ करोड ७८ लाख रुपैयाँ थियो।
बैंकले खुद ब्याज आम्दानी साढे २३ करोड रुपैयाँले बढाएसँगै नाफामा उच्च बृद्दि हासिल गर्न संभव भएको हो। गत आवको असोज मसान्तमा २८ करोड छ लाख रुपैयाँ खुद ब्याज आम्दानी हासिल गरेको बैंकले चालु आवमा ५१ करोड ५६ लाख रुपैयाँ कमाएको छ।
गत आवको तुलनामा बैंकको खराव कर्जा एक प्रतिशत बिन्दुले घटेको छ। गत असोज मसान्तमा खराव कर्जा १.६९ प्रतिशतमा सिमित भएको हो। बैंकको कुल निक्षेप १८ करोड रुपैयाँले बढेर ५२ अर्ब ७१ करोड रुपैयाँ पुगेको छ भने कुल कर्जा १७ अर्ब रुपैयाँले बृद्धि भइ ४६ अर्ब ४५ करोड रुपैयाँ पुगेको छ।
७ कार्तिक २०७३, १२।००
वि.सं.२०७३ कात्तिक ७ आइतवार १२:३२ मा प्रकाशित
