बुटवल । नेकपा (एमाले)का उपाध्यक्ष वामदेव गौतमले अख्तियार दुरुपयोग अनुसन्धान आयोगका प्रमुख लोकमानसिंह कार्कीले राजनीतिक पार्टीमाथि अराजनीतिक काम गरेकाले महाअभियोग प्रस्तावको बाटो लिनुपरेको बताएका छन् । प्रेस चौतारी रुपन्देहीले मणिग्राममा आयोजना गरेको पत्रकार भेटघाट कार्यक्रममा गौतमले भने, “राजनीतिक पार्टीप्रति पूर्वाग्रही ढङ्गबाट संविधान र कानुन विपरीत प्रतिशोध साँध्ने षडयन्त्र गरेकाले कार्कीप्रति दलहरुको विश्वास डगमगाएको हो ।”
गौतमले मुलुकमा अहिले संविधान असफल बनाउने कोसिस भइरहेको आरोप लगाएका छन् । संविधान संशोधनका नाममा मधेस र पहाडलाई अलग गराउने र बहुराष्ट्र बनाउने प्रयास भइरहेको छ भन्दै त्यस्तो प्रयासलाई एमालेले पूरा हुन नदिइने उनले बताए ।
उनले भने,“हिमाल, पहाड र तराई मिलाउने गरी संविधान संशोधनको प्रस्ताव आए त्यसलाई सघाउन एमाले तयार छ ।”
नेता गौतमले वर्तमान सरकार निर्वाचन गराउने दिशामा अघि नबढेको आरोप लगाउँदै संविधान कार्यान्वयनका लागि २०७४ माघ ७ गतेसम्म तीन तहको निर्वाचन हुनैपर्नेमा जोड दिए ।
प्रकाशित मितिः २०७३ कार्तिक ७
वि.सं.२०७३ कात्तिक ७ आइतवार १३:१२ मा प्रकाशित
