काठमाडौं। नेपाल हाइड्रो डेभलपर लिमिटेडले दुई लाख ६० हजार कित्ता प्राथमिक सेयर निष्काशन गरेको छ । कम्पनीले दोलखाका आयोजना प्रभावितका लागि एक सय रुपैंया अंकित मूल्यमा दुई करोड ६० लाख रुपैयाँ बराबरको सेयर निष्काशन गरेको छ ।
यो सेयर दोलखाको भिमेश्वर नगरपालिका ८, ९ र ११ वडा नंम्बर तथा मागपौवा गाविस ५ र काटाकुटी गाविस ६ का वासिन्दाले भर्न पाउँछन्। मंसिर १६ गतेबाट निष्काशन भएको शेयरका लागि प्रभावितहरुले छिटोमा पुस १० तथा ढिलोमा माघ दुई गतेसम्ममा आवेदन दिन सक्नेछन् ।
आयोजना प्रभावितहरुले हाइड्रोको प्राथमिक शेयरका लागि अरनिको डेभलपमेण्ट बैंक दोलखा, तथा चरिकोट शाखा, कालिञ्चोक डेभलपमेण्ट बैंकको चरिकोट तथा बाघखोर शाखामा सम्पर्क गर्नुपर्ने छ ।
नेपाल उद्योग वाणिज्य महासंघका अध्यक्ष पशुपति मुरारका सञ्चालक रहेको कम्पनीको सेयरमा कम्तिमा ५० कित्ता र वढिमा एक हजार कित्तासम्म आवेदन दिन सकिन्छ। कम्पनीको कुल सेयरमध्ये ७५ प्रतिशत संस्थापकसँग छ।
कुल २५ प्रतिशत सर्वसाधारणलाई छुट्याइएको मध्ये १० प्रतिशत आयोजना प्रभावितलाई बिक्री गर्न लागिएको हो। बाँकी १५ प्रतिशत चाँडै आमसर्वसाधारणलाई विक्री वितरण गरिने छ। कम्पनीको सेयरको निस्कासन तथा बिक्री प्रबन्धकमा एमएमबी क्यापिटल छ।
१६ मंसिर २०७३, १०।३०
वि.सं.२०७३ मंसिर १६ बिहीवार १०:५५ मा प्रकाशित
