काठमाडौ । चिकित्सा शास्त्र अध्ययन संस्थान (आईओएम)का डिनमा प्रा.डा. जगदीशप्रसाद अग्रवाल नियुक्त भएका छन् । अग्रवाललाई आईओएमको डिनमा नियुक्त गरेको त्रिविका प्रवक्ता भोला ढकालले जानकारी दिए । २१ दिनदेखि अनसनरत प्रा.डा. गोविन्द केसीले प्राध्यापक बनेको वरिष्ठताको आधारमा अग्रवाललाई नै डिन नियुक्त हुनुपर्ने अडान राख्र्दै आएका थिए ।
स्रोतका अनुसार प्रधानमन्त्री पुष्पकमल दाहालले शिक्षामन्त्री धनीराम पौडेल र त्रिविका उपकुलपति डा.तीर्थ खनियाँलाई अनसनको निकासका लागि वार्ता समितिले भनेअनुसारकै डिन तुरुन्त नियुक्त गर्न निर्देशन दिएपछि अग्रवालको नियुक्ति भएको हो ।
यो सँगै डा.केसीका प्रतिनिधि र सरकारी पक्षबीच वार्ताले शनिबार साँझसम्ममा केसीको अनसनको निकास निस्किने सम्भावना बढेर गएको छ । केसीको जीवनरक्षाका लागि भन्दै आईओएमका डिन केपी सिंहले शुक्रबार नियुक्ति भएको २० दिनमा राजीनामा दिएका थिए ।
प्रकाशित मितिः २०७३ मंसिर १८
वि.सं.२०७३ मंसिर १८ शनिवार १९:४३ मा प्रकाशित
