सोलुखुम्बु । चौलाखर्क र गोली गाविसमा उत्पादन भएको अलैँची बिक्री हुन नसक्दा किसान मारमा परेका छन्। यस वर्ष १५ किलो मात्र उत्पादन भएको अलैंची मुस्किलले हजार रुपैयाँमा पनि बिक्री नभएपछि किसान मारमा परेका हुन् ।
गत वर्ष किसानबाट खरिद गरेको अलैँची स्थानीय व्यापारीले अझै बिक्री गर्न सकेका छैनन्। स्थानीय व्यापारी डम्बरबहादुर बस्नेतका अनुसार पहिलाकै अलैँची मौज्दात भएका कारण यस वर्ष उत्पादन भएको अलैँची बिक्री हुन सकेको छैन।
गत वर्ष ती गाविसमा ३२ हजार किलो अलैँची उत्पादन भएकामा यस वर्ष १५ हजार किलो मात्र उत्पादन भएको बस्नेतले बताए। गत वर्ष व्यापारीले किसानबाट प्रतिकिलो दुई हजार ३०० देखि दुई हजार ४०० सम्ममा खरिद गरेको अलैँची यस वर्ष मुश्किलले प्रतिकिलो एक हजारका दरले बिक्री भइरहेको छ।
गत वर्ष मूल्य बढ्ने आशामा जेठ महिनासम्म अलैँची घरमै थन्काएर राखेका चौलाखर्कका अलैँची किसान सुरथबहादुर बस्नेत बताउँछन्। एक हजार र पाँच सयका भारतीय नोटको प्रतिबन्धपछि अलैँची किनबेचमा कमी आएको उनको भनाई छ।
“अलैँची बिक्री नहुँदा घरायसी आवश्यकता पूरा गर्न समस्या भएको छ,” बस्नेतले भने। चौलाखर्कमा अधिकांश किसानले धान फल्ने खेत मासेर अलैँची रोपेका थिए । खोल्सा खोल्सी र पानी लगाउन मिल्नेजति पाखा बारीमा पनि अलैँची खेती गरिएको छ । जिल्लाको गोली, गुदेल, बासालगायत गाविसमा पनि अलैँची खेती विस्तार हुँदै गएको छ।
३० मंसिर २०७३, १।३०
वि.सं.२०७३ मंसिर ३० बिहीवार १९:४७ मा प्रकाशित
