काठमाडौ । गुराँस लाईफ इन्स्योरेन्स कम्पनीको ८ प्रतिशत बोनस पाउन आज अर्थात् जेठ २८ गतेसम्म सेयर लिईसकेको हुनुपर्नेछ । कम्पनीले असार ९ गते साधारण सभा बोलाएको छ । त्यसका लागि जेठ २९ गते बुक क्लोज गर्दैछ ।
कम्पनीले आठ प्रतिशत बोनस बाँडेपछि दुई बराबर एक अर्थात पचास प्रतिशत हकप्रद बिक्री गर्ने भएको छ । कम्पनीको यसअघिको संचालक समितिको बैठकले आठ प्रतिशत बोनस वितरणपश्चात उक्त परिमाणमा हकप्रद बिक्री गर्ने प्रस्ताव गरेको हो ।
कम्पनीले प्रस्ताव गरेको बोनस र हकप्रद कम्पनीको आगामी साधारणसभापछि लगानीकर्तालाई वितरण गरिनेछ ।
हाल कम्पनीको चुक्तापूँजी ५५ करोड रुपैयाँ रहेको छ । आठ प्रतिशत बोनसपछि कम्पनीको पूँजी ५९ करोड ४० लाख रुपैयाँ पुग्नेछ । त्यसपश्चात ५० प्रतिशत हकप्रद जारी गरेपछि कम्पनीको पूँजी ८९ करोड १० लाख रुपैयाँ पुग्नेछ ।
प्रकाशित मितिः २०७४ जेठ २८
वि.सं.२०७४ जेठ २८ आइतवार १२:०० मा प्रकाशित
