भानुआटुको आमबाइ द्विपमा आएको ज्वालामुखीबाट प्रभावित भएका ११ हजार छ सयलाई उद्धार गरिएको सरकारी अधिकारीहरूले जानकारी दिएका छन् । ज्वालामुखीका कारण गतहप्ता भरी चट्याङ र अन्य अवषेशका कारण गाँउभरी वर्षा भइरहेको थियो । साथै ज्वालामुखीले साउथ प्यासिफिक आइसल्याण्ड राज्यका पानीका स्रोतसमेत प्रदुषित भएको छ ।
सरकारी अधिकारीहरूलाई उद्धृत गर्दै भानुआटु दैनिकपत्रले लेखेको छ, “आमबाइमा ज्वालामुखीबाट प्रभावित सबैलाई हामीले उद्धार गरेर त्यहाँबाट हटाएका छौँ ।” विस्थापित गरिएका यी व्यक्तिहरूका युवायुवती, बृद्धबृद्धा, आपाङ्ग र बिरामीसमेत रहेको सो पत्रिकाले लेखेको छ ।
भानुआटुका प्रधानमन्त्री चारलोट साल्वाईले बुधबार घटनास्थलको स्थलगत अवलोकन गरेका थिए । यस इलाकामा प्रान्तीय सरकारले संकटकाल लागू गरिएको घोषणा गरेको छ । घटनास्थलका वास्तविक स्थिति आफैले थाहा पाउनका लागि प्रधानमन्त्रीले घटनास्थलको अवलोकन गरेको प्रधानमन्त्रीका एक जना जनसम्पर्क अधिकृतले जानकारी दिएका छन् ।
त्यहाँका जनताको जीवनलाई सरकारले सबैभन्दा प्राथमिकतामा राखेर उद्धार र सहयोगका प्रयास गरिरहेको उनले बताएका छन् ।
प्रकाशित मितिः २०७४ असोज १९
वि.सं.२०७४ असोज १९ बिहीवार १५:५८ मा प्रकाशित
