काठमाडौं । नेकपा एमालेले गणेशप्रसाद तिमल्सिनालाई राष्ट्रिय सभा अध्यक्षको उम्मेदवार बनाउने निर्णय गरेको छ। सोमबार बिहान सिंहदरबारमा बसेको शीर्ष नेताको बैठकले तिमल्सिनालाई राष्ट्रिय सभा अध्यक्ष बनाउने निर्णय गरेको हो।
पर्वत जिल्लाका तिमल्सिना प्रदेश नम्बर ४ बाट निर्वाचित राष्ट्रिय सभा सदस्य हुन्। दिउसो एक बजे राष्ट्रिय सभा अध्यक्ष निर्वाचनका लागि मनोनयन दर्ताको समय तोकिएको छ। अध्यक्ष पदका लागि बुधबार निर्वाचन हुने भएको छ।
संविधानको धारा ९२ मा राष्ट्रिय सभाको पहिलो बैठक प्रारम्भ भएको मितिले १५ दिनभित्र राष्ट्रिय सभाका सदस्यहरूले आफूमध्येबाट राष्ट्रिय सभाको अध्यक्ष र उपाध्यक्षको निर्वाचन गर्नेु उल्लेख छ। राष्ट्रिय सभाको अध्यक्ष र उपाध्यक्ष मध्ये एक जना महिला हुने संवैधानिक व्यवस्था छ।
स्थायी सभाका रुपमा रहेको राष्ट्रिय सभाका सदस्यहरूको पदावधि छ वर्षको हुने संवैधानिक व्यवस्था छ। राष्ट्रिय सभाका एक तिहाइ सदस्यको पदावधि प्रत्येक दुई वर्षमा समाप्त हुन्छ।यो संविधान प्रारम्भ भएपछि पहिलो पटक सदस्यको पदावधि कायम गर्दा गोला प्रथाद्वारा एक तिहाइको दुई वर्ष, अर्को एक तिहाइको चार वर्ष र बाँकी एक तिहाइको ६ वर्षको हुने गरी पदावधि कायम गरिने संविधानमा व्यवस्था छ।
२०७४ फागुन २८ गते प्रकाशित
वि.सं.२०७४ फागुन २८ सोमवार १२:१८ मा प्रकाशित
