काठमाडौं । बुटवल पावर कम्पनीले २० प्रतिशत नगद लाभांश दिने भएको छ । हालै बिक्री गरेको एफपीओपछि कायम हुने पुँजीको २० प्रतिशत नगद लाभांश वितरण गरिने कम्पनीले जनाएको छ । लाभांश एफपीओ भर्ने लगानीकर्ताले पनि पाउनेछन् । लाभांश प्रस्ताव जेठ ८ गते बस्ने वार्षिक साधारण सभामा पेश हुनेछ । यसका लागि बुटवलले वैशाख २७ गतेदेखि सभा हुने दिनसम्म बुक क्लोज गर्नेछ ।
वैशाख २६ गतेसम्म कायम सेयरधनीले मात्र कम्पनीले दिने २० प्रतिशत नगद लाभांश पाउने छन् । बुटवल पावर कम्पनीले माघ १५ गतेदेखि १९ गतेसम्म २ अर्ब ४ करोड ४५ लाख ८१ हजार रुपैयाँ बराबरको ४० लाख ८१ हजार कित्ता एफपीओ निष्कासन गरेको थियो ।
यो कम्पनीले ३ चिनियाँ कम्पनीसँगको संयुक्त लगानीमा ‘एससीआइजी इन्टरनेसनल नेपाल हाइड्रो जोइन्ट डेभलपमेन्ट कम्पनी’ स्थापना गरेको थियो । नेपालमा जलविद्युत विकास गर्ने उद्देश्यले १ अर्ब ९० करोड रुपैयाँ पुँजीको यो कम्पनी स्थापना भएको बुटवल पावरले जनाएको छ ।
२०७४ चैत २६ गते प्रकाशित
वि.सं.२०७४ चैत २६ सोमवार १६:३६ मा प्रकाशित