काठमाडौँ । भारतीय दूतावासले आठौँ दक्षिण एशियाली जुडो च्याम्पियनसिपका विजेता भारतीय खेलाडीलाई बधाई दिएको छ । नेपालका लागि भारतीय राजदूत मञ्जीवसिंह पुरीले आज जुडो प्रतियोगिताका विजयी टोलीका खेलाडी तथा अधिकृतलाई बधाई ज्ञापन गरे । सोमबार नेपालमा सम्पन्न उक्त खेलमा पुरुष र महिला टोली इभेन्ट्समा भारत च्याम्पियन बनेको थियो ।
भारतको पुरुष टोलीले पाकिस्तानलाई फाइनलमा ३–२ ले हराएर स्वर्ण पदक जितेको थियो । त्यसैगरी महिला टोली इभेन्टमा भारतले नेपाललाई हराएको थियो । त्यसैगरी व्यक्तिगत इभेन्टमा पनि १० स्वर्णपदक जितेर भारत पहिलो भएको थियो ।
महिलातर्फका सबै स्वर्णपदक भारतले नै हात पारेको थियो । नेपाल प्रतियोगितामा दुई स्वर्ण पदक प्राप्त गरी दोस्रो भएको थियो । भारतका तर्फबाट सात महिला, छ पुरुष र तीन अधिकृतको सहभागिता थियो ।
भारतीय टोलीका प्रशिक्षक विजय पटेलले प्रतियोगिता व्यवस्थापन राम्रो भएको र आफ्ना खेलाडीले त्यसको भरपूर सदुपयोग गरेर उपाधि जित्न सफल भएको प्रतिक्रिया दिए । सो प्रतियोगिताको नवौँ संकरण बंगलादेशमा हुनेछ ।
२०७५ बैशाख ११ गते प्रकाशित
वि.सं.२०७५ वैशाख ११ मंगलवार ११:३१ मा प्रकाशित
