नेपालगञ्ज । नेपालगञ्ज सुर्खेतरोडको गुरुद्वारा अगाडि रहेका पसलहरुमा आगलागी हुँदा . ३ करोड रुपैयाँ बराबरको क्षति भएको अनुमान गरिएको छ ।
गुरुद्वारादेखि उपमहानगरपालिका छेउसम्मका एक दर्जनभन्दा बढी फर्निचर पसल आगलागीबाट खरानी भएका छन् । आगलागीबाट हिमालय स्टिल, सानिया स्टिल, स्टार स्टिल, वारसी स्टिल, बिन्देश्वरी फर्निचर, न्यू रुबी, प्रतापसिंहको फर्निचर, आलिया फर्निचर, अमन फर्निचर, ए–वान फर्निचर, वावा फर्निचर, बाबा टे«र्डस र सरदार डेण्टल जलेर खरानी भएका छन् ।
प्रत्यक्षदर्शी सरोजकुमार चन्दका अनुसार नेपालगञ्जका दुईओटा, कोहलपुरको एउटा र नेपालगञ्ज विमानस्थलमा रहेको एउटा गरी चार ओटा दमकललाई आगलागी नियन्त्रणमा लिन हम्मेहम्मे परेको थियो ।
‘फर्निचर पसलहरु रहेकाले आगो नियन्त्रणमा आउन गाह्रो भएको थियो,’ प्रत्यक्षदर्शी चन्दले भने । चार ओटा दमकलसहित प्रहरीले करीब तीन घण्टापछि आगलागी नियन्त्रणमा लिएको थियो ।
आगालागीबाट करीब ३ करोडको क्षति भएको अनुमान गरिएको प्रहरीले बताएको छ । क्षतिको पूर्ण विवरण आउन केही समय लाग्ने बताइएको छ । विद्युत सर्ट भएर एउटा फर्निचरमा लागेको आगो अन्यत्र सल्किएको थियो ।
२०७६ साउन २४ गते प्रकाशित
वि.सं.२०७६ साउन २४ शुक्रवार १४:४० मा प्रकाशित
