काठमाडौं । हिमालयन बैंकले चालु आर्थिक वर्षको दोस्रो त्रैमाशमा नाफा २७.४५ प्रतिशत बढाएको छ । बैंकले पुससम्म ६ महिनाको अवधिमा १ अर्ब ७४ करोड २४ लाख रुपैयाँ खुदनाफा गरेको छ ।
गत वर्षको सोही अवधिमा बैंकले १ अर्ब ३६ करोड ७० लाख रुपैयाँ नाफा गरेको थियो । गत वर्षको तुलनामा चालु आर्थिक वर्षमा ३७ करोड ५३ लाख रुपैयाँ नाफा बढेको छ ।
६ महिनामा गरेको नाफाबाट बैंकले सेयरधनीलाई ९२ करोड ९२ लाख रुपैयाँ लाभांश वितरण गर्न सक्ने छ । समीक्षा अवधिमा बैंकले २ अर्ब ५७ करोड ८० लाख रुपैयाँ खुदब्याज आम्दानी गरेको छ ।
गत वर्षको सोही अवधिमा बैंकको ब्याज आम्दानी २ अर्ब ४९ करोड ३४ लाख रुपैयाँ थियो । बैंकको प्रतिसेयर आम्दानी ४० रुपैयाँ ९० पैसा छ ।
बैंकको निष्क्रिय कर्जा बढेर १.२८ प्रतिशत पुगेको छ । गत वर्षको सोही अवधिमा १.२५ प्रतिशत निष्क्रिय कर्जा थियो । ६ महिनामा बैंकले १० करोड ९५ लाख रुपैयाँ प्रोभिजनिङ गरेको छ ।
बैंकको निक्षेप लागत ६.३४, सीसीडी ७३.४, आधारदर ८.९४ र स्प्रेडदर ५.३२ प्रतिशत छ । स्प्रेडदर बढी भएकाले बैंकले नाफा बढाएको हो । बैंकको सञ्चित कोषमा ६ अर्ब ११ करोड रुपैयाँ छ ।
वि.सं.२०७६ माघ २२ बुधवार १०:५२ मा प्रकाशित