हेटौँडा । काठमाडौं रुटमा ६ वटा र काठमाण्डौ उपत्यकामा २४ वटा बस सञ्चालन गरिने प्रदेश सरकारले जनाएको छ । काठमाडौं उपत्यका र आसपासका जिल्लामा २४ वटा सीटी बस सञ्चालन गर्न लागिएको संयोजक निरौलाले जानकारी दिनुभयो ।
बागमती प्रदेशले विद्युतीय बस खरिदका लागि चालु आर्थिक वर्षमा भने छुट्टै बजेटको व्यवस्था गरेको छैन । तर चालु आर्थिक वर्षमा भौतिक पूर्वाधार तथा विकास मन्त्रालयले बस खरिदका लागि १० करोड रुपैयाँ खर्च गर्नसक्ने छ । यो रकम विद्युतीय बस खरिद गर्नका लागि भनेर किटान गरेर राखिएको बजेट भने होइन ।
खरिद सहजीकरण समितिका संयोजक दिपक निरौलाले भन्नुभयो, ‘अर्थ मन्त्रालयसँगको सहकार्यमा रकम जम्मा गर्ने तयारी गरिएको छ । अहिले ग्लोबल टेण्डर गर्न पुग्दो रकम प्रदेश सरकारसँग छैन ।
प्रदेश सरकारले अन्य शीर्षकबाट रकमान्तर गरेर मात्र बस खरिद गर्न सक्छ । सरकारले बस खरिद गर्दा रकमको सुनिश्चितता नभइकन टेण्डर गर्न नपाइने कानुनी व्यवस्था रहेको छ ।
चार्जिङ स्टेशन निर्माणमा अन्योलता
विद्युतीय बस खरिद गर्ने अन्तिम तयारी गरिरहँदा चार्जिङ स्टेशन कहाँ निर्माण गर्ने भन्ने विषयमा अन्योलता कायमै छ । चार्जिङ स्टेशन निर्माण गर्न विद्युत प्राधिकरण, सङ्घीय सरकार र प्रदेश सरकारको समन्वयमा मात्र निर्माण गर्न सकिन्छ ।
बस समयमै नेपाल भित्रिए चार्जिङ स्टेशनबिना त्यसै थन्कने देखिन्छ । तर यसको सबै तयारी भएको समितिका संयोजक निरौला बताउनुहुन्छ । चार्जिङ स्टेशन हेटौँडा उपमहानगरपालिका, भरतपुर, धादिङ र काठमाडौंमा निर्माण गर्न लागिएको छ ।
बस खरिदका लागि तीन मन्त्रालय एक जुट
बस खरिदका लागि तीन मन्त्रालय एक जुट भएका छन् । प्रदेशको मुख्यमन्त्री कार्यालय, आर्थिक मामिला तथा योजना मन्त्रालय र भौतिक पूर्वाधार विकास मन्त्रालय अन्तिम तयारीमा छन् ।
वि.सं.२०७६ फागुन १३ मंगलवार ०७:०३ मा प्रकाशित