काठमाडौं । अर्थमन्त्री युवराज खतिवडाको ठाउँमा नेकपाका उपाध्यक्ष वामदेव गौतमलाई राष्ट्रियसभामा पठाउने विषयलाई लिएर सत्तारुढ दलभित्रको चर्किएको विवादले बिहीबारको सेयर बजारलाई खासै प्रभावित गरेन ।
बिहीबार सेयर बजारले नयाँ उचाइ लिएको छ। कारोबार अंकमा नयाँ रेकर्ड कायम भएको छ भने नेप्से परिसूचकमा उछाल कायम नै छ । साताको अन्तिम दिन बजारमा ४ अर्ब ४६ करोड रुपैयाँको कारोबार भएको छ । यो अहिलेसम्मकै उच्च अंक हो । बुधबार ४ अर्ब १५ करोडको सेयर कारोबार भएको थियो ।
बजारमा दिनभर निकै उतारचढाप देखिए पनि अन्तत : बजारले छलाङ मारेको छ। नेप्से सूचक ३६.०५ अंकले बढेर १६३२.१७ विन्दुमा आइपुगेको छ । १८० कम्पनीको ४ अर्ब ४६ करोड रुपैयाँभन्दा बढीको सेयर कारोबार भएको छ ।
वामदेवलाई राष्ट्रियसभा पठाउने तयारी र निर्णयपछि युवराज अर्थमन्त्री हट्ने र नयाँ अर्थमन्त्री आउने आशमा लगानीकर्ताहरु उत्साहित हुँदा बजार चम्किएको विश्लेषण गरिए पनि बजार वृद्धिको कारण त्यो मात्र नभएको बिहीबारको कारोबार अंक र परिसूचकले देखाएको छ ।
बजारमा स्वभाविक रुपमा सुधारको कोर्समा अघि बढेकोले राजनीतिक घटनाक्रमले यसको गति अब खासै प्रभावित नहुने लगानीकर्ताहरु बताउँछन् ।
लामो समयदेखि सुस्ताएको सेयर बजार दुई हप्तादेखि एकाएक चम्किएको हो। सेयर बजार सुधारका लागि नीतिगत, प्राविधिक तथा मनोवैज्ञानिक हिसाबले भइरहेका प्रयासको सकारात्मक प्रभावमा बजारमा देखिएको छ ।
वि.सं.२०७६ फागुन १५ बिहीवार १५:५६ मा प्रकाशित