काठमाडौं । नुन, चिनीलगायत दैनिक उपभोग्य वस्तुको पर्याप्त मौज्दात रहेको जनाउँदै साल्ट ट्रेडिङ कर्पोरेशनले ती वस्तुको अभाव नभएको प्रष्ट पारेको छ ।
कर्पोरेशनले करीब १० महीनासम्म नेपालको माग धान्न सक्ने गरी ती वस्तुको मौज्दात रहेको बताएको हो । उपभोग्य वस्तुको विक्री वितरण गर्दै आएको कर्पोरेशनका विभागीय प्रमुख व्रजेशकुमार झाले करीब १० महिनालाई पुग्ने नुन मौज्दात रहेको जानकारी दिए ।
कर्पोरेशनसँग १ लाख ५८ हजार ५०० मेट्रिक टन नुन मौज्दात छ । ‘नेपालको १० महीनाको माग धान्ने नुन कर्पोरेशनसँग मौज्दात रहेको छ’, उनले भने, ‘नुनको कुनै अभाव छैन ।’ अहिले नेपाली बजारमा मासिक १६ हजार मेट्रिक टन नुन खपत हुँदै आएको छ ।
नुनको आयातमा कुनै व्यवधान नभएको पनि कर्पोरेशनले बताएको छ । यसैगरी कर्पोरेशनले चिनीको पनि पर्याप्त मौज्दात रहेको भन्दै अनावश्यक भण्डारण नगर्न उपभोक्तालाई आग्रह गरेको छ । कर्पोरेशनसँग करीब पाँच महीनालाई पुग्ने १० हजार मेट्रिक टन चिनी मौज्दात रहेको विभागीय प्रमुख झाले बताए । हाल २ हजार ५०० मेट्रिक टन चिनी गोदाममा रहेको छ भने ७ हजार ५०० मेट्रिक टन चिनी आयातका क्रममा स्थलमार्गमा रहेको छ ।
नेपालका चिनी उद्योगसँग १ लाख १ हजार मेट्रिक टन चिनी मौज्दात रहेको उद्योग, वाणिज्य तथा आपूर्ति मन्त्रालयले बताएको छ । त्यसैगरी खाद्य व्यवस्था तथा व्यापार कम्पनीले करिब तीन महीनाको माग धान्ने गरी देशभर २५ हजार ६६९ मेट्रिक टन चामल मौज्दात रहेको बताएको छ ।
त्यस्तै दुर्गम तथा हिमाली जिल्लामा ४ हजार १६ मेट्रिक टन चामल मौज्दात रहेको छ । कम्पनीले फागुन दोस्रो सातासम्म १९ हजार ५२२ मेट्रिक टन धान खरीद गरेको छ ।
सरकारले दैनिक उपभोग्य वस्तुको पर्याप्त मौज्दात रहेको जनाउँदै ती सामग्रीको अनावश्यक भण्डारण नगर्न र नआत्तिन सम्पूर्ण उपभोक्तामा पुन : आग्रह गरेको छ ।
कृत्रिम अभाव सिर्जना गर्ने, वस्तुहरूको मूल्यवृद्धि गर्ने तथा मुनाफा कमाउने ढंगले बजारलाई प्रभावित पार्नेविरुद्ध सरकारले कठोररूपमा प्रस्तुत हुने बताएको छ । रासस
वि.सं.२०७६ फागुन २५ आइतवार १२:३८ मा प्रकाशित