काठमाडौं । प्राइम कमर्सियल बैंकले कैलाश विकास बैंकलाई प्राप्ति गरी २९ फागुन बिहीबारबाट एकीकृत कारोबार सुरु गर्ने भएको छ ।कैलाशलाई गाभेपछि प्राइम कमर्सियल बैंकको नाममा एकीकृत कारोबार हुनेछ ।
गत असार २० गते प्राइम कमर्सियल बैंकले कैलाश विकास बैंकलाई प्राप्ति गर्ने सम्बन्धी सम्झौतामा हस्ताक्षर गरेको थियो । यस्तै गत पुस २५ गते छुट्टाछुट्टै सम्पन्न भएको दुवै बैंकको साधारण सभाले प्राइमले कैलाशलाई प्राप्त गर्ने विशेष प्रस्ताव पारित गरेका थिए ।
दुवै बैंकले पारित गरेको उक्त प्रस्तावलाई नेपाल राष्ट्र बैंकले यही फागुन १८ गते अन्तिम स्वीकृति दिएको थियो भने कम्पनी रजिष्ट्रारको कार्यालयले फागुन २१ गते स्वीकृति दिएको थियो ।
२९ गतेबाट एकीकृत कारोबार सुरु गर्नका लागि भोलि २८ गते बुधबार दुवै बैंकको बैंकिङ, एटीएम, एसएमएस, इन्टरनेट बैंकिङ्ग, मोबाइल बैंकिङ्ग लगायतका सेवा बन्द रहने बैंकले जनाएको छ ।
मर्जरपश्चात् बन्ने बैंकको केन्द्रीय कार्यालय साविकको प्राइम कमर्सियल बैंकको केन्द्रीय कार्यालय नै रहनेछ भने प्रमुख कार्यकारी अधिकृत पनि प्राइमकै नारायणदाश मानन्धर रहनेछन् ।
वि.सं.२०७६ फागुन २७ मंगलवार १४:०१ मा प्रकाशित