काठमाडौं । प्रधानमन्त्री केपी शर्मा ओलीलाई आफ्ना ९० वर्षीय बुबा मोहनप्रसाद ओलीले प्रधानमन्त्री निवास बालुवाटारमा स्वागत गर्नुभएको छ ।
मिर्गौला प्रत्यारोपण गरिएको दशौं दिनको दिन अस्पतालबाट डिस्चार्ज हुनुभएका प्रधानमन्त्री ओली शुक्रबार बेलुका प्रधानमन्त्री निवास जानुभएको हो ।
अस्पताल जाने क्रममा पनि प्रधानमन्त्री ओलीलाई बुबाले आशीर्वाद दिँदै बिदा गर्नुभएको थियो । २०६४ सालमा भारतमा प्रधानमन्त्री ओलीको पहिलोपल्ट मिर्गौला प्रत्यारोपण गर्नुभएका ओलीको दोस्रो मिर्गौला प्रत्यारोपण १० दिन अघि गरिएको थियो ।
अस्पतालबाट डिस्चार्ज भएलगत्तै प्रधानमन्त्री ओलीले मिर्गौला प्रत्यारोपणमा सहयोग गर्नेहरुप्रति आभार व्यक्त गर्नुभएको छ । सामाजिक सञ्जाल टिवटरमा उहाँले भन्नुभएको छ–बाह्रदिन लामो अस्पताल बसाइपछि मिर्गौला प्रत्यारोपण गरेर म आज आफ्नो निवासमा फर्केको छु । मेरो मिर्गौलाको सफल प्रत्यारोपण गर्ने चिकित्सकहरुप्रति विशेष आभारी छु ।”
त्यसैगरी उहाँले अस्पतालमा रहँदा आफ्नो स्वास्थ्यलाभको कामना गर्ने सबै नेपाली दिदीबहिनी र दाजुभाइहरुमा धन्यवाद ज्ञापन गर्नुभएको छ ।
वि.सं.२०७६ फागुन ३० शुक्रवार १९:३२ मा प्रकाशित