काठमाडौं । धितोपत्र बजारको नियामक निकाय नेपाल धितोपत्र बोर्ड (सेबोन) ले हतोत्साहित नभई लगानी गर्न आग्रह गरेको छ ।
पछिल्लो समय धितोपत्र बजारलाई कोरोना भाइरससँग जोडेर बजारप्रति नकारात्मक हल्लाहरु फैल्याउने कार्य भइरहेको भन्दै सेबोनले हल्लाको पछि नलाग्न अनुरोध गरेको हो ।
हालसम्म कोरोना भाइरसको प्रकोप नेपालमा नदेखिएको र यसको रोकथाम तथा नियन्त्रण पूर्वसावधानीका विभिन्न कदमहरु सरकारले चालिरहेको जानकारी गराउँदै सेबोनले विज्ञप्तिमार्फत यसबाट आत्तिएर शेयर विक्री गर्नुपर्ने अवस्था नरहेको बताएको छ ।
सेबोनले धितोपत्रको प्राथमिक बजार र दोस्रो बजार विकास तथा विस्तारका लागि विभिन्न कार्यहरु अगाडी बढाइरहेको साथै सूचीकृत कम्पनीहरुको वित्तीय अवस्थासमेत सन्तोषजनक रहेकाले यस्तो सामान्य अवस्थामा हतोत्साहित नभई हल्लाको पछि लागेर शेयर नबेच्न पनि सेबोनले भनेको छ ।
१ हजार ६०० विन्दु पार गरेको नेप्से परिसूचक अनावश्यक हल्लाको पछि लगानीकर्ता लाग्दा बुधबार १ हजार २५५ विन्दुमा आइसकेको छ । केहि समयअघि मात्र एकै दिन करीब रू.५ अर्बसम्म कारोबार भएको थियो ।
यस्तो छ विज्ञप्ति :
वि.सं.२०७६ चैत ५ बुधवार १६:५५ मा प्रकाशित