काठमाडौं । नेपाल निर्माण व्यवसायी महासंघले निर्माण व्यवसायी कोषबाट कोभिड–१९ संक्रमण रोकथाम, नियन्त्रण तथा उपचार कोषमा रू.१ करोड सहयोग गर्ने भएको छ ।
महासंघको बैठकले विश्वमा फैलँदै गएको कोभिड–१९ को नेपालमा सम्भावित संक्रमणलाई रोकथामका लागि उक्त रकम सहयोग गर्ने निर्णय गरेको हो ।
महासंघका महासचिव रोशन दाहालले देशमा परेको विपत्तिको सामना गर्नका लागि निर्माण व्यवसायीले समेत सरकारलाई हातेमालो गर्न उक्त रकम सहयोग गर्न लागेको जानकारी दिए ।
महासंघले मंगलवार बिहानदेखि चैत १८ गते साँझसम्म सरकारले गरेको ‘लकडाउन’को निर्णयको स्वागत समेत गरेको छ । ‘कोभिड–१९ भाइरसका कारण आउनसक्ने विषम परिस्थितिको पूर्वतयारीअनुसार गरिएको ‘लकडाउन’को निर्णय महासंघ स्वागत गर्दछ’, महासचिव दाहालले भने ।
महासंघले ‘लकडाउन’को समयमा निर्माण व्यवसायी सदस्यले आआफ्नो निर्माण कार्य बन्द गरी घरभित्र सुरक्षितरुपमा बस्न सबैलाई आग्रहसमेत गरेको छ ।
अहिलेको असहज अवस्थामा समेत अतिआवश्यक निर्माण परियोजनामा खटिएका निर्माण व्यवसायीलाई आफू र मातहतका सबैको सुरक्षामा विशेष ध्यान दिनसमेत महासंघले अनुरोध गरेको छ । रासस
वि.सं.२०७६ चैत १२ बुधवार ०७:१३ मा प्रकाशित
