स्याङ्जा । स्याङ्जाको पुतलीबजार नगरपालिकाले नियमित डायलसिस गराइरहेका मिर्गौला बिरामीहरुलाई बन्दाबन्दी अवधिमा निशुल्क गाडी उपलब्ध गराएको छ ।
बुधबारदेखि बिरामीहरुका लागि गाडी सेवा उपलब्ध गराउन थालेको नगर प्रमुख सिमा कुमारी क्षेत्रीले बताइन् । बन्दाबन्दीको अवधिमा भाडा बढेकाले पनि बिरामीहरुलाई निशुल्क सेवा दिएको नगर प्रमुख क्षेत्रीले बताइन् ।
उनले भनिन, “हप्तामा तीन पटकसम्म डायलसिस गर्न जानुपर्ने बिरामीका लागि थप आर्थिक भार परेको थाह भएपछि यो निर्णय गरेका हौं ।” नगरपालिकाले ग ३ च ११०० नम्बर प्लेटको स्कारपियो गाडी भाडामा लिएर डायलसिस गर्न जानेहरुलाई सुविधाको लागि उपलब्ध गराएको हो ।
हालसम्म सात जना मिर्गौला बिरामीहरुले डायलसिस गर्न जाने मिति, समय र अस्पतालको नाम टिपाएका छन् । बुधबार एक जनाले र बिहीबार दुई जनालाई डायलसिस गर्न पोखराका विभिन्न अस्पताल लगिएको छ ।
वि.सं.२०७६ चैत २० बिहीवार १२:१६ मा प्रकाशित
