काठमाडौं । ताप्लेजुङको पाथीभरा याङ्वरक गाउँपालिकाले कोरोना भाइरस (कोभिड–१९) बिरुद्ध खट्ने स्वास्थ्यकर्मीलाई शतप्रतिशत भत्ता दिने भएको छ ।
कोभिड–१९ को सन्त्रासले मानव जीवनलाई त्रसित बनाइरहेको बेला यसबिरुद्ध अग्रभागमा रहेर काममा खटिने स्वास्थ्यकर्मीलाई गाउँपालिकाले तलब बराबर नै प्रोत्साहन भत्ता उपलब्ध गराउने भएको हो ।
पाथीभरा याङ्वरक गाउँपालिकाका अध्यक्ष केशरकुमार मेन्याङ्बोका अनुसार काममा खटिएका स्वास्थ्यकर्मीका सहयोगी कार्यकर्तालाई पनि ७५ प्रतिशत प्रोत्साहन भत्ता दिइने छ ।
कोरोना सङ्क्रमण रोकथाम नियन्त्रण तथा उपचार कोषबाट स्वास्थ्यकर्मी र सहयोगीलाई उक्त प्रोत्साहन रकम दिने निर्णय गरिएको अध्यक्ष मेन्याङ्बोले जानकारी दिनुभयो ।
कार्यपालिकाको बैठकले पालिकास्तरीय कोरोना रोकथाम तथा नियन्त्रण समिति समेत चयन गरेको र गठित समितिले आफ्नो जिम्मेवारीअनुसार कार्ययोजना बनाएर काम गर्ने गाउँपालिकाले जनाएको छ ।
अध्यक्ष मेन्याङ्बोकै संयोजकत्वमा बनेको समितिले बनाएको कार्ययोजनाअनुसार काममा खट्ने स्वास्थ्यकर्मीलाई प्रोत्साहन भत्ता दिइने छ ।
स्वास्थ्यकर्मीलाई दिइने भत्ता लगायत कोरोना रोकथाम तथा नियन्त्रणका सबैखाले क्रियाकलापमा खर्च गर्नेगरी गाउँपालिकाले करिव १६ लाख रुपियाँको कोष पनि स्थापना गरेको छ ।
गाउँपालिकाका सबै जनप्रतिनिधिको एक महिनाको सेवा सुविधाबापतको रकम तीन लाख ७८ हजार २०० रुपियाँ, बिपद् व्यवस्थापन कोषको सात लाख र आकस्मिक कोषको पाँच लाख गरी कूल १५ लाख ७८ हजार २०० रुपियाँको कोरोना सङ्क्रमण रोकथाम नियन्त्रण तथा उपचार कोष गाउँपालिकाले खडा गरेको छ ।
वि.सं.२०७६ चैत २६ बुधवार ०७:५९ मा प्रकाशित