सिड्नी । अष्ट्रेलियाको न्यु साउथ वेल्स(एनएसडब्लु) राज्यले ४४ करोड डलरको घरभाडा राहत प्याकेज घोषणा गरेको छ । ग्लाडिस बेरिजिक्लियन नेतृत्वको राज्य सरकारले व्यावसायिक एवं आवासीय घर भाडा राहत प्याकेजका लागि सोमबार घोषणा गरेको हो ।
नयाँ व्यवस्था अनुसार कोरोना भाइरसको कारण आवासीय भाडावालाले आफ्नो कुल आयमा २५ प्रतिशतभन्दा बढि क्षति व्यहोर्नु परेमा घरधनी र त्यस्ता पिडित भाडावालले विश्वासको आधारमा भाडा तिर्ने बारे कुराकानी गर्नुपर्नेछ ।
आगामी ६ महिनासम्मका लागि लागू गरिने उक्त नयाँ सरकारी व्यवस्थामा भाडावालले महामारीबाट प्रभावित भएर भाडा तिर्न नसके घरधनीले उनीहरुलाई निकाल्न सक्ने छैनन् ।
त्यसको बदलामा न्यु साउथ वेल्स राज्य सरकारले मालपोत करमा छुट दिने बताइएको छ जसअनुसार आवासीय घरधनीहरुले २५ प्रतिशतसम्म छुट पाउनेछन् । तर, त्यो छुट पाउन उनीहरुले आर्थिक संकट भोगिरहेका आफ्ना भाडावालहरुलाई उक्त बचत पास गरी दिनुपर्नेछ ।
भाडावाल र धनधनीविच राम्ररी छलफल भए नभएको बारेमा अनुगमन पनि हुने बताइएको छ । त्यस्तै भाडामा बस्ने मानिसहरुलाई अर्को झन्डै २३ लाख डलर विनियोजन गर्ने पनि बताइएको छ । –एनएसडब्लु
वि.सं.२०७७ वैशाख १ सोमवार १५:३६ मा प्रकाशित