काठमाडौं । लकडाउन लामो समय लम्बिने भएपछि सरकारले आर्थिक क्षेत्रमा केही लचकता अपनाएको छ । थप १० दिन लकडाउन लम्ब्याउने निर्णय गरेको सरकारले उद्योग र अन्य केही व्यवसाय सञ्चालन गर्न दिने निर्णय गरेको हो ।
सरकारले आगामी १८ जेठसम्म सीमा बन्द गर्ने निर्णय गरेको छ । सो अवधिसम्म राष्ट्रियरअन्तराष्ट्रिय उडान बन्द गर्ने निर्णय गरेको छ । यसअघि ३१ वैशाखसम्म यस्तो निर्णय भएको थियो ।
बुधबारको मन्त्रिपरिषद् बैठकले आगामी ५ जेठसम्म लकडाउन लम्ब्याएर विभिन्न क्षेत्र सञ्चालन गर्ने निर्णय गरेको छ । बैठकले राजमार्ग र सहायक राजमार्गमा स्वास्थ्यसम्बन्धी मापदण्ड पालना गरेर होटेल/रेस्टुरेन्ट, वर्कसप तथा पेट्रोल पम्प सञ्चालन गर्न दिने निर्णय गरेको हो । तर, कम्तीमा ५० किलोमिटरको दूरीमा मात्र यस्ता होटेलहरू खोल्न पाइनेछ । जहाँ खानाको प्याकेट मात्र बेच्न पाइनेछ ।
‘खासगरी ढुवानीका साधन लिएर हिँड्नुपर्ने चालकहरू तथा अति आवश्यकीय काममा हिँड्नुपर्ने व्यक्तिहरूका लागि सेवा प्रवाह गर्न जरुरी भएकाले राजमार्ग र सहायक राजमार्गमा कम्तीमा ५० किलोमिटरको दूरीमा सम्बन्धित स्थानीय तहले तोकेको स्थानमा स्वास्थ्य तथा जनसंख्या मन्त्रालयले बनाएको मापदण्ड लवलम्बन गरी सवारीसाधन मर्मत गर्ने वर्कसप, पेट्रोल पम्प र खानाको प्याकेट मात्र बिक्री गर्ने गरी होटेलररेस्टुरेन्ट सञ्चालन गर्ने व्यवस्था स्थानीय प्रशासनले मिलाउने निर्णय भएको छ,’ अर्थ तथा सञ्चारमन्त्री डा.युवराज खतिवडाले बुधबार आयोजित पत्रकार सम्मेलनमा भने । तर, होटेलररेस्टुरेन्टमा पाँचजनाभन्दा धेरैको भिड गर्न पाइने छैन ।
कुनकुन ठाउँका होटेल सञ्चालन गर्न दिने सम्बन्धित जिल्लाको प्रशासन तथा स्थानीय तहले तय गर्नेछ । बैठकले विभिन्न किसिमका उद्योगहरू तथा विकास निर्माणका काम सञ्चालन गर्न दिने निर्णय गरेको छ ।
उद्योगलाई स्यानिटाइज गरी त्यहाँ काम गर्ने कामदारको स्वास्थ्य परीक्षण गर्ने र सबैलाई एकैठाउँमा राख्नुपर्ने भएको छ । निर्माण सामग्री ओसारपसारमा पनि अनुमति दिइएको छ ।
ढुवानी सेवाका चालकहरूको विवरण राखिने
ढुवानीका साधनमा आवतजावत रोक्न नाकामा चालक तथा सहचालकको विवरण राखिने भएको छ । ढुवानी सेवा खुलेसँगै ती सवारीसाधनमा यात्रु चढ्न सक्ने भएकाले नाकाबाट बाहिरिने र भित्रिने क्रममा थप व्यक्ति सवारीसाधनमा बस्न पाउने छैन ।
कसैले यात्रु राखेमा त्यस्ता सवारीसाधन नियन्त्रणमा लिई कारबाही गरिने मन्त्री खतिवडाले बताए । एम्बुलेन्स दुरुपयोग हुन नदिन पनि निगरानी गर्ने सरकारको निर्णय छ ।
पुस्तक पसल खोल्न पाइने
सवारीसाधन बनाउने वर्कसप पनि बिहीबारदेखि सञ्चालन गर्न पाइने भएको छ । तर, बढीमा पाँचजनासम्म मात्र कामदार उपस्थित हुन पाउनेछन । स्थानीय तहले नियमन गर्ने गरी वर्कसप सञ्चालन गर्न दिने निर्णय भएको हो ।
त्यस्तै, प्लम्बिङ तथा इलेक्ट्रिकल व्यवसाय पनि खोल्न पाइने मन्त्री खतिवडाले बताए । पुस्तक पसल खोल्न पाइने र पुस्तकको ढुवानीसमेत खुला गरिएको छ ।-नयाँ पत्रिका दैनिकबाट
वि.सं.२०७७ वैशाख २५ बिहीवार ०७:५३ मा प्रकाशित
