काठमाडौं । परराष्ट्रमन्त्री प्रदीप ज्ञवालीले भारतसँग वार्ताको पहल भैरहेको बताउनुभएको छ । प्रतिनिधिसभा अन्तर्गतको अन्तर्राष्ट्रिय सम्बन्ध समितिको बैठकमा उहाँले सरकारको प्राथमिकता वार्ताबाट समस्याको समाधान गर्नु रहेको बताउनुभयो ।
उहाँले दुवै पक्षले स्वीकार गरेको पक्ष भनेको परराष्ट्र सचिव स्तरीय वार्ता नै हो भन्दै प्रधानमन्त्री वा परराष्ट्रमन्त्री तहमा तत्काल कुरा गर्न नचाहेको बताउनुभयो ।
कोरोना नियन्त्रणपछि नभई भारतसंग तत्कालै वार्ता चाहेको उहाँको भनाई थियो । परराष्ट्रमन्त्री ज्ञवालीले सीमा विवाद अहिले नै अन्तर्राष्ट्रियकरण गर्ने पक्षमा सरकार नरहेको स्पष्ट पार्नुभयो ।विगतमा समस्याको समाधान नहुनुका पछाडि दलहरुबिचको एकता नहुनु पनि एक रहेको उहाँले टिप्पणी गर्नुभयो ।
भूमि सुधारमन्त्री पद्मा अर्यालले नेपालको नक्सामा लिम्पियाधुरा पहिल्यैदेखि नभएको विषयमा आफूले राखेको भनाईलाई सञ्चार माध्यमले गलत रुपमा प्रस्तुत गरेको जिकिर गर्नुभयो ।
वि.सं.२०७७ वैशाख २९ सोमवार १२:३३ मा प्रकाशित