काठमाडौं । सत्तारुढ नेपाल कम्युनिष्ट पार्टीका वरिष्ठ नेता माधवकुमार नेपालले भारतसँगको सीमामा तारबारको कुरा उठाएपछि यसले बहसको रुप लिएको छ ।
पूर्व प्रधानमन्त्री तथा वरिष्ठ नेता नेपालले सोमबार बसेको अन्तराष्ट्रिय समितिको बैठकमा सिमानामा काँडेतार लगाउन प्रस्ताव गरेका थिए । त्यही प्रस्तावमा समर्थन जनाउँदै नेकपा स्थायी कमिटी सदस्यसमेत रहेका शंकर पोखरेलले खुला सीमाकै कारण कोरोना संक्रमण बढेको पनि तर्क गरेका छन्।
’कोभिड-१९को महामारीविरुद्धको लकडाउन र सीमा नाका बन्द गर्ने सरकारको निर्णय कार्यान्वनमा देखिएको चुनौतीले पनि खुला सीमाको जटिलता महसुस गराएको छ’, उनले भनेका छन,’पछिल्लो समय नेपालमा कोभिड-१९ का संक्रमितहरु बढ्नुको मुख्य कारण असुरक्षित तरिकाले सिमापारीवाट लुकिछिपी आउनु पनि हो।’ ’भारतसँग सधैँ बाझेर सकिँदैन, सीमामा पर्खाल र काँडेतार लगाऊँ’ पोखरेलले भन्सारबिन्दुबाहेक अन्यत्र आउजाउ रोक्नै पर्नेमा जोड दिए ।
’भन्सारबिन्दुका नाकाबाहेक अरु ठाउँबाट आउजाउ रोकिने अवस्था रहेको भए कोभिड-१९को संक्रमण नियन्त्रण गर्न सहज हुने थियो’, उनले भनेका छन, ’तसर्थ सीमा क्षेत्रका जनताको सुविधाका लागि आउजाउका नाका थप गरेर भए पनि नेपाल-भारत सिमानामा तारवार गर्नु आवश्यक छ।’ पोखरेलले अब भारतसँग हुने वार्तामा यसलाई प्रमुखताका साथ उठाउनुपर्ने माग गरेका छन्।
’नेपाल-भारत सीमा समस्याको समाधानका लागि हुने वार्तामा यसलाई पनि महत्वपूर्ण एजेण्डा बनाइनु पर्दछ’, उनले भनेका छन, ’सामयिक र दुरगामी महत्वको प्रस्तावका लागि वरिष्ठ नेता माधव नेपाललाई हृदय देखिनै धन्यवाद!’ मुख्यमन्त्री पोखरेलले भारतसँगको खुला सीमाको फाइदा उठाउँदै नेपाल छिरेका कपिलवस्तुका १० भन्दा धेरै नागरिकमा कोरोना संक्रमण देखिएपछि यस्तो कुरा उठाएका हुन्। नेपालको तराई क्षेत्रका जिल्लामा भेटिएका कोरोना संक्रमित भारतबाट लुकेर आएका धेरै छन्।
वि.सं.२०७७ वैशाख २९ सोमवार १८:३६ मा प्रकाशित