एजेन्सी । भारतमा मंगलबार (आज) देखि यात्रुवाहक रेल सेवा सञ्चालन हुँदैछ । कोरोनाभाइरस संक्रमणका कारण बन्द भएको रेल सेवा केन्द्र सरकारको निर्णयमा झण्डै २ महिनापछि शुरु हुन लागेको हो ।
कोरोनाको संक्रमण बढिरहेकै अवस्थामा रेल सेवा सुरु गरेकोमा कतिपय राज्य सरकारहरुले भने असन्तुष्टि जनाएका छन् । भारतमा कोरोनाभाइरस संक्रमितको संख्या ७० हजारभन्दा बढी छ भने दुई हजार दुईसय जनाको मृत्यु भइसकेको छ । तेस्रोपटक थपिएको बन्दाबन्दी १७ मेमा सकिँदैछ ।
तत्कालका लागि दिल्लीबाट राँची, चेन्नई, मुम्बई, पटना, विलासपुर, जम्मूलगायत १५ गन्तव्यका लागि मात्र रेलसेवा सञ्चालन हुनेछ । भारतको रेलसेवा सार्वजनिक यातायातका लागि प्रमुख सेवामा पर्दछ ।
रेलसेवा सञ्चालनका लागि गृहमन्त्रालयले रेलसेवा सञ्चालन विशेष निर्दे्शिका जारी गर्दै कोरोनाभाइरसको लक्षण नभएका यात्रुले मात्रै यात्रा गर्न पाउने भनेको छ ।
त्यसका लागि पहिले नै टिकट लिनुपर्नेछ भने सामाजिक दुरी कायम र मास्क अनिवार्य लगाउनुपर्ने भारतीय सञ्चारमाध्यमहरुले जनाएका छन् ।
वि.सं.२०७७ वैशाख ३० मंगलवार ०८:२० मा प्रकाशित