पश्चिम रुकुम । पश्चिम रुकुमको चौरजहारी नगरपालिकाले क्वारेटाइनमा बस्नेलाई दैनिक १ सय ७८ रुपैयाँ भत्ता दिने निर्णय गरेको छ । यसअघि क्वारेन्टाइनमा बसेकालाई नगरपालिका आफैँले खाने व्यवस्था गर्दै आएकोमा, अब नगद भक्ता दिने निर्णय गरिएको हो ।
पछिल्लो समय भारत तथा अन्य ठाँउबाट नगरपालिका आउनेको संख्या बढ्दै गएपछि सो निर्णय गरिएको नगरपालिकाले जनाएको छ । नगरपालिकाका अनुसार अब भारत तथा अन्य ठाउँबाट आउनेहरूलाई १४ वटा वडाका क्वारेन्टाइनमा राखिने छ ।
त्यस्तैगरी दैनिक भक्तासहित क्वारेन्टाइनमा बसेका व्यक्तिहरूका लागि खाना पकाउने सामाग्रीको पनि व्यवस्था गरिने छ । क्वारेन्टाइनमा बस्दा आफूले खाने थाल, कचौरा, ग्लास र ओढ्ने–ओछ्याउने कपडा सम्बन्धित व्यक्तिले व्यवस्था गर्नुपर्ने नगरपालिकाले जनाएको छ ।
क्वारेन्टाइनमा नगरपालिकाले मास्क, स्यानिटाइजर, साबुन, खानेपानीका लागि ड्रम, फिल्टर र शौचालय सरसफाईका लागि आवश्यक सामाग्री पनि प्रदान गरेको छ । दाउराको समस्या हुने वडामा ग्यास र चुलाको समेत व्यवस्था गरिने नगरप्रमुख विशाल शर्माले जानकारी दिए ।
पश्चिम रुकुम, चौरजहारी नगरपालिकाबाट ३ हजार २ सय ४४ जना भारतका विभिन्न ठाउँमा मजदूरी गर्न गएका छन् । यति बेला उनीहरु घर फर्कन शुरु गरेको र शुक्रबार मात्र ३४ जना भित्रिएको नगरपालिकाले जनाएको छ ।
वि.सं.२०७७ जेठ १० शनिवार १७:४३ मा प्रकाशित