काठमाडौं । फ्रन्टलाइनमा खटिने नेपाल प्रहरी र सशस्त्र प्रहरीमा समेत कोरोना संक्रमणको जोखिम देखिएको छ । शान्ति सुरक्षा लगायतका महत्त्वपूर्ण कार्यमा खटिने सुरक्षाकर्मीमाथि कोरोनाको संक्रमण देखिन थालेपछि जोखिम बढेको हो ।
सामूहिक रुपमा काम गर्ने सुरक्षा निकायकै व्यक्तिमाथि कोरोना देखिएपछि सम्भव भएसम्म उच्च स्वास्थ्य सतर्कता अपनाएको नेपाल प्रहरीका केन्द्रीय प्रवक्ता डीआईजी निरज शाही बताउँछन् ।
बुधबार बिहानसम्म १७ जना प्रहरीलाई कोरोना संक्रमण पुष्टि भएको छ । प्रवक्ता शाहीका अनुसार हालसम्म बारामा ७, धनकुटामा २, काठमाडौंमा २, धनुषामा २, कपिलवस्तुमा २ र बाँकेमा १ र धनुषामा १ गरी १७ जना प्रहरीमा कोरोना भाइरसको संक्रमण देखिएको छ ।
यसबाहेक कालीमाटीका २३१ प्रहरीको आरडीटी परीक्षणको नतिजा आउन बाँकी छ । प्रहरी पनि कोरोनाको जोखिममा रहेको बताउँदै प्रवक्ता शाहीले स्वास्थ्य सुरक्षाका मापदण्डलाई अंगीकार गरेर कार्यक्षेत्रमा खटिएको बताए ।
यस्तै सशस्त्र प्रहरी बलका ४ जनामा हालसम्म कोरोना भाइरसको संक्रमण पुष्टि भएको डीआईजी प्रवीण श्रेष्ठले जानकारी दिए । -बाह्रखरीबाट
वि.सं.२०७७ जेठ १४ बुधवार १२:१० मा प्रकाशित
