हेमन्त के. सी, जाजरकोट । रुकुम पश्चिम चौरजहारी नगरपालिका सोतीमा घटेको अमानवीय घटनाबारे अध्ययन गर्न गठित उच्चस्तरिय समितिले आफ्नो काम थालेको छ ।
घटनाबारे छानवीन गर्न सरकारले गठन गरेको उच्चस्तरिय समिति जाजरकोट पुगेको छ । समितिले शुक्रबारदेखि काम थालेको र शुक्रबार नै पीडित पक्षसँग भेटघाट गरेको जाजरकोटका प्रमुख जिल्ला अधिकारी जनकराज पन्तले जानकारी दिए ।
त्यस्तै उक्त छानविन समितिले भेरी नगरपालिका –४ का सन्जु भनिने सन्जिव बिकको शव स्वास्थ्य सेवा कार्यालयमा पुगेर अध्ययन गरेको थियो ।
घटनाका विषयमा संसददेखि सडकसम्म चर्को दवाव भएपछि सरकारले गृहमन्त्रालयका सहसचिव जीतेन्द्र बस्नेतको संयोजकत्वमा पाँच सदस्यीय छानविन समिति गठन गरेको थियो ।
दलिय युवा र गैरदलित युवती बीच प्रेम भएको र उक्त प्रेमलाई बिबाहमा परिणत गर्न पुगेका युवाहरुको समुह युवती पक्षका गाउँलेको आक्रमणमा परेको थियो । त्यसपछि सरकारले गठन गरेको उच्चस्तरिय समितिको टोली शुक्रबार जाजरकोट आइपुगेर अध्ययनको काम थालेको हो ।
उक्त घटनामा जाजरकोट भेरी नगरपालिका –४ का २१ वर्षीय नवराज विक, सन्जु विक ,गणेश बुढा, भेरी नगरपालिका ११ का लोकेन्द्र सुनार र चौरजहारीका टीकाराम सुनारको निधन भएको छ । उनीहरुको शव यस अघि नै फेला परिसकेको छ ।
भेरी नगरपालिका ११ का गोविन्द शाही अझै बेपत्ता छन् । मृतकको शव हेरेर मात्र अनुसन्धान गर्न पीडित परिवारको माग अनुसार शव हेरेर अनुसन्धान थालिएको समितिका संयोजक जीतेन्द्र बस्नेतले बताए ।
शुक्रबार नै यस टोली रुकुम पश्चिम चौरजहारी नगरपालिका – ८ सोतीमा जाने प्रजिअ पन्तले जानकारी दिए । उच्चस्तरिय समितिमा गृहमन्त्रालयका सहसचिव जीतेन्द्र बस्नेत, एसएसपि जनक भट्राई, राष्ट्रिय अनुसन्धानका सह–अनुसन्धान निर्देशक ओमबहादुर खड्का, उपसचिव वशिष्ट घिमिरे र उपसचिव माधव ढकाल सहभागी छन् ।
यसैबीच उच्चस्तरिय समितिलाई शुक्रबार दलित अधिकारकर्मी संघ र संगठनले निष्पक्ष छानविन गर्न भन्दै ६ बुँदे माग ज्ञापनपत्र बुझाएको अधिकारकर्मी पार्वती बिकले बताइन ।
वि.सं.२०७७ जेठ १६ शुक्रवार १३:०३ मा प्रकाशित