काठमाडौं । उपत्यकाका तीनै जिल्लाका प्रमुख जिल्ला अधिकार (प्रजिअ) ले लकडाउनको कडाइका साथ पालना गर्नुको विकल्प नरहेको निष्कर्ष निकालेका छन् ।
लकडाउन उलङ्घन गर्ने क्रम बढेपछि बिहीबार काठमाडौं, भक्तपुर, ललितपुरका प्रजिअहरूको बैठक बसेको थियो । बैठकले सरकारले जेठ ३२ गतेसम्म कायम गरेको लकडाउनलाई कडाइका साzथ पालना गर्ने निर्णय गरेको ललितपुरका प्रमुख जिल्ला अधिकारी नारायणप्रसाद भट्टले जानकारी दिए ।
“सरकारले ३२ गतेसम्म लकडाउनको घोषणा गरेको छ । सरकारको निर्देशनको अवज्ञा गर्ने छुट कसैलाई छैन । लकडाउन खुकुलो बनाउने अधिकार हामीलाई छैन,” उनले बैठकको निष्कर्ष सुनाउँदै भने, “सरकारले तोकेको अवधिसम्म लकडाउनको पालना सबैले गर्नुपर्छ ।
सरकारको निर्देशन प्रभावकारी रूपमा कार्यान्वयन गर्नुपर्छ भन्ने हाम्रो सामूहिक निकर्ष हो,” उनले भने । उपत्यकामा सङ्क्रमणको जोखिम बढेकाले लकडाउन उलङ्घनमा कडाइलाई कायमै राखिने बताए । भक्तपुरकी प्रमुख जिल्ला अधिकारी हुमकला पाण्डेले पनि सरकारको निर्देशनअनुसारै लकडाउनलाई पालना गरिने बताइन् ।
“हामी छलफलमै छौं । लकडाउनका सन्दर्भमा पीएमसीले निर्णय गर्ने कुरा होइन । क्राइसिस म्यानेजमेन्ट सेन्टर (सीएमसी) ले नै निर्णय गर्छ । अहिलेको अवस्थामा लकडाउनको पालना हुनुपर्छ,” उनले भनिन् ।
उपत्यकाका प्रजिअहरूले लकडाउनलाई अहिलेकै अवस्थामा पालना गराउने निष्कर्ष निकाले पनि आजै अपराह्न मन्त्रिपरिषद् बैठक बस्दै छ । आज बस्ने मन्त्रिपरिषद् बैठकले लकडाउनको मोडालिटीमा केही हेरफेर गर्ने सङ्केत मिलेको छ ।
लकडाउनको अवधि निरन्तर बढाइपछि आक्रान्त बनेका व्यापारी–व्यवसायीहरूले स्वतस्फूर्त अवज्ञा गर्न थालेका छन् । उपत्यकाका धेरै स्थानमा पसलहरू खुलेका छन् । सवारी र मानिसहरूको आवागमनमा पनि वृद्धि भएको छ । -बाह्रखरीबाट
वि.सं.२०७७ जेठ २२ बिहीवार १४:०२ मा प्रकाशित
