सिमकोट । कर्णाली प्रदेशको हिमाली जिल्ला हुम्लाको सर्केगार्ड गाउँपालिकाले जिल्ला बाहिरबाट उद्धार गरि क्वारेन्टिनमा बस्ने नागरिकलाई दैनिक पाँच सय रुपियाँ भत्ता दिने भएको छ ।
बिहिीबार बसेको गाउँ कार्यपालिकाको बैठकले हालसम्म गाउँपालिकामा जिल्ला बाहिरबाट उद्धार गरि ल्याएर क्वारेन्टिनमा बसेका सबै नागरिकलाई सो भत्ता दिने निर्णय गरेको हो ।
क्वारेन्टिनमा बस्दै आएका नागरिक र नागरिक समाजबाट जिल्ला बाहिरबाट उद्धार गरि आएका नागरिकहरुलाई क्वारेन्टिन भत्ताको व्यवस्था गर्नु पर्ने माग आएपछि गाउँपालिकाको गाउँ कार्यपालिकाको बैठकले दैनिक १४ दिनका लागि पाँच सय रुपियाँ भत्ता दिने निर्णय गरेको वडा नम्बर ५ का अध्यक्ष एबं गाउँपालिकाका प्रबक्ता कर्णजंग शाहीले बताए ।
उद्धार गरी आएका नागरिकलाई खाना खर्चमा सहयोग पुर्याउन गाउँपालिकाले सहयोग गरेको हो। हान क्वारेन्टिनमा रहेकाहरुलाई सम्बन्धित व्यक्तिको घरबाट खाना बस्नको ब्यबस्था गरिदै आएको छ।
गाउँपालिकामा प्रबेश गर्ने नागरिकहरुलाई सम्बन्धित वडाले क्वारेन्टिनको ब्यबस्था गरि राख्दै आएको छ।केही दिन अगाडी काठमाडौं, नेपालगंज र सुर्खेतबाट आएका २२४ जना नागरिक हाल क्वारेन्टिनमा रहदै आएका छन्।
गत बैशाखयता हालसम्म सर्केगार्ड गाउँपालिकामा ३८५ जना नागरिकहरुको उद्धार गरिएको छ। सबै नागरिकलाई क्वारेन्टिन भत्ता दिन उक्त गाउँपालिकाले २६ लाख ९५ हजार रुपियाँ खर्च गर्ने प्रबक्ता शाहीले बताए ।
उक्त पैसा तत्काल निकासा गरेर बितरण गरिने भएको छ। यसअघि पनि उक्त गाउँपालिकाले जिल्ला बारिह रहदै आएका गाउँपालिकाका सबै नागरिकहरुलाई प्रतिब्यक्ति दुई हजार रुपियाँ आर्थिक सहयोग गरेको थियो । -देश सञ्चारबाट
वि.सं.२०७७ जेठ २२ बिहीवार १९:०९ मा प्रकाशित
