काठमाडौं । सिमाना सुरक्षामा तैनाथ सशस्त्र प्रहरीका अर्का हाकिम सिपाहीको पिटाइले घाइते भएका छन् । अघिल्लो महिना कपिलवस्तुमा डिएसपी मानबहादुर शाही इन्स्पेक्टर भट्टराईबाट पिटिएको कार्वाही नटुङ्गिदै त्यही क्रमको अर्को श्रृंखला देखिएको छ कैलालीमा ।
जेठ २२ गते बिहीबार साँझ साढे आठ बजेतिर कैलालीको भारतीय सीमावर्ती नाका भुइयाफाँटा बिओपीमातहत अस्थायी चेकपोस्ट बड्किपलिघाटमा सुरक्षार्थ तैनाथ सशस्त्र प्रहरीहरु आफूआफैँमा कुटाकुट गर्दा एकजना सई र पाँच सिपाही सख्त घाइते भएका हुन् ।
कोरोना संक्रमणका कारण सीमा कडाइ गरिने क्रममा कैलालीका गौरीफन्टा, त्रिनगरसहितका सानातिना नाकामा त्यहाँस्थित बिओपीबाट विभिन्न दर्जाको कमाण्डमा सशस्त्र प्रहरी परिचालन गरिएको छ ।
त्यसमध्ये सईको कमाण्डमा १२ जनाको टुकडी खटाइएको उक्त नाकामा तैनाथ सशस्त्र कर्मचारीबीच बिदामा गएको बेलाको राशनसमेत खाइदिएको मुध्दालाई लिएर भएको वादविवादपछि बिहीबार झडप भएको थियो ।
आफूहरु छुट्टीमा गएको समयको राशन कमाण्डरका रुपमा रहेका सई रामबहादुर टेर र हवल्दार दौलतसिङ्ह धामीले खाइदिएको भन्दै दुईजना सिपाही जितेन्द्रप्रसाद भट्ट र दिपक बोगटीले बाहिरबाट मापसे गरी फर्केर राति आफ्ना कमाण्डरमाथि भान्छाबाट लखेट्दै दाउराको चिर्पटले हानेको र पोस्ट ड्युटीमा तैनाथ जवानले बोकेको हतियार खोस्न पुगेको आरोप छ ।
सो दिनको घटनामा सहायक हवल्दार हिमाल तारामी मगर,पुरन मगर,शिवराज सुनार,दिपकबहादुर बुढा र चित्रबहादुर थापा पनि घाइते भएका छन् । आक्रमणकारी सिपाहीद्वयले सबलाई भागाभाग बनाएपछि छोटकिपलियाबाट असइ दानसिङ्ह बोहोरा र ३४ नम्बर गण हेडक्वार्टरबाट आएका डिएसपी अम्मरबहादुर ऐरको टोलीले उनीहरुलाई अर्धनग्न अवस्थामा पोस्टपछाडिको झाडी र रोडबाट नियन्त्रणमा लिएको थियो ! सई कराएपछि उनलाई बचाउन अन्य दर्जाका सशस्त्र प्रहरी त्यहाँ पुगे । तर,बचाउन गएकाहरु नै कुटिए ।
त्यसमध्ये आक्रमणकारी दुई सिपाहीले पेस्तोलसहित सईको सुरक्षाका लागि पुगेका अर्का सिपाहीबाट पेस्तोल खोस्न खोजेका थिए । तर, पेस्तोल बोकेका सिपाही भाग्नाले पेस्तोल खोसिएन र थप क्षति हुन पाएन ।
यसबारे छानवीन गर्न सशस्त्र प्रहरी मुख्यालय हलचोकको टोली कैलाली पुगिसकेको छ । सरुवा नेताले भनेर हुने, बढुवा पनि त्यतैबाट भनेपछि हुने कारण सशस्त्र प्रहरीभित्र अनुशासनहीनता मौलाएको बताइन्छ । -जनआस्थाबाट
वि.सं.२०७७ जेठ २५ आइतवार २१:२१ मा प्रकाशित
