काठमाडौं । समता लघुवित्त वित्तीय संस्थाले घरेलु लघुवित्त वित्तीय संस्थालाई गाभ्ने भएको छ । यी दुई कम्पनीविच एक आपसमा गाभ्ने /गाभिने सम्बन्धि सैद्धान्तिक सहमति पत्रमा सोमवार हस्ताक्षर भएको हो ।
सैद्धान्तिक सहमति पत्रमा हस्ताक्षर भएपश्चात समता लघुवित्तले शेयर कारोबार नेपाल स्टक एक्सचेञ्ज (नेप्से) ले रोक्का गरेको छ । घरेलु लघुवित्तको १०० कित्ता शेयर बराबर समता लघुवित्तको ८० कित्ता आदान प्रदान गर्ने गरि यी दुई कम्पनी एक आपसमा गाभिन लागेका हुन् ।
बारा जिल्लाको जितपुर सिमरा उपमहानगरपालिका वडा नं २ मा रजिष्टर्ड केन्द्रीय कार्यालय रहेको समता लघुवित्तले २४ ओटा शाखा कार्यालयमार्फत ३७ हजारभन्दा बढी ग्राहक सदस्यहरुलाई सेवा प्रदान गरिरहेको छ भने काभ्रेपलाञ्चोक जिल्लाको बनेपा नगरपालिकामा रजिष्टर्ड केन्द्रीय कार्यालय रहेको घरेलु लघुवित्तले १३ ओटा शाखा कार्यालय मार्फत ६ हजारभन्दा बढी सदस्यहरुलाई सेवा दिइरहेको छ ।
समता लघुवित्त धितोपत्र बजारमा सूचीकृत कम्पनी हो भने घरेलुले हालसम्म सर्वसाधारणलाई शेयर जारी गरेको छैन । घरेलु लघुवित्तको संस्थापकतर्फबाट मात्र कायम भएको चुक्तापूँजी रू. ७ करोड ३ लाख ५० हजार छ ।
हालसम्म घरेलुले तेस्रो त्रैमासको वित्तीय विवरण सार्वजनिक गरेको छैन । दोस्रो त्रैमाससम्म उक्त कम्पनीको जगेडाकोष रकम रू. २१ लाख ४५ हजार ऋणात्मक थियो । त्यस अवधिसम्म घरेलुले रू. १४ करोड २३ लाख ७ हजार निक्षेप संकलन गरेको छ भने रू. १८ करोड ८२ लाख १२ हजार कर्जा प्रवाह गरेको छ ।
उक्त कम्पनीको निष्क्रिय कर्जा शून्य रहेको छ । त्यस्तै रू. १९ करोड ११ लाख चुक्तापूँजी रहेको समता लघुवित्तको जगेडा कोष रकम रू. ९ करोडभन्दा बढी छ । चालू आर्थिक वर्षको तेस्रो त्रैमाससम्म समताले रू. ३ करोड ३८ लाख ४५ हजार खुद नाफा गरेको छ ।
वि.सं.२०७७ असार १ सोमवार १७:१९ मा प्रकाशित
