जाजरकोट । पश्चिम रुकुमको चौरजहारी–८, सोतीमा हत्या गरिएका जाजरकोटका नवराज विकसहितका ६ जनाको परिवारलाई सरकारले १० लाखका दरले राहत उपलब्ध गराउने तयारी थालेको छ ।
सुष्मा मल्ल र नवरोज विकबीचको प्रेम विवाह रोक्न चौरजहारीका वडाध्यक्ष डम्बरबहादुर मल्लको योजनामा सोतीलगायत चार गाउँका मानिस मिलेर उनीहरूको हत्या गरी भेरी नदीमा फालिएको निष्कर्षमा गृह मन्त्रालयले निकालेको छ ।
६ युवाको नृशंस हत्या गरिएको ठहर गरेको मन्त्रालयले पीडित परिवारलाई जनही १० लाखका दरले राहत उपलब्ध गराउन माग गर्दै मन्त्रिपरिषदमा प्रस्ताव पठाएको छ । यसका लागि बजेट व्यवस्था गरिदिन अर्थ मन्त्रालयमा पनि पत्र पठाइएको गृह मन्त्रालयका अधिकारीले जानकारी दिएका छन् ।
यस्तै आक्रमणमा परी घाइते भएकाहरूको निःशुल्क उपचारको व्यवस्था गर्ने पनि प्रस्ताव गरिएको छ । आफूले पठाएको प्रस्ताव मन्त्रिपरिषद्बाट अनुमोदन भएपछि मृतकका परिवारलाई राहत उपलब्ध गराइने गृह मन्त्रालले जानकारी गराएको छ । अहिले हत्या काण्डमा मुख्य योजनाकार डम्बरबहादुर मल्लसहित ३४ जनाविरुद्ध मुद्दा दर्ता भइसकेको छ ।
वि.सं.२०७७ असार २ मंगलवार ०८:३५ मा प्रकाशित