विक्रम सुनार, काठमाडौं । बैंक तथा वित्तीय संस्थाहरुले चालु आर्थिक वर्षको बैशाख मसान्तसम्म ३६ खर्ब ९३ अर्ब ९३ करोड निक्षेप संकलन गरेका छन । राष्ट्र बैंकले हालै सार्वजनिक गरेको बैशाखसम्मको मासिक प्रतिवेदनले यस्तो देखाएको हो ।
बैंक तथा वित्तीय संस्थाहरुको यो निक्षेप गत आर्थिक वर्षको सो अवधिको तुलनामा १०.१ प्रतिशतले बढि हो । गत आवको सो अवधिमा ३१ खर्ब ५८ अर्ब ९८ करोड निक्षेप संकलन भएको थियो ।
बैंक तथा वित्तिय संस्थाहरुका विभिन्न खाताहरुमध्ये सबैभन्दा बढी निक्षेप व्यक्तिगत खातामा रहेको छ । व्यक्तिगत खाताको निक्षेप खातामा रु. २० खर्ब ३३ अर्ब ८२ करोड रकम जम्मा भएको छ । सबैभन्दा कम निक्षेप भने स्थानिय सरकारको खातामा रहेको छ । उक्त खातामा ६० अर्ब ८० करोड रुपैयाँ निक्षेप रहेको छ ।
यस्तै, विदेशी मुद्रामा रु. १ खर्ब ८ अर्ब १ करोड भन्दा बढी रकम जम्मा भएको छ । साथै, सञ्चय कोष, बीमा कम्पनीहरु, नागरिक लगानी कोष जस्ता गैर–बैंकिङ संस्थाहरुले रु. ६ खर्ब १६ अर्ब २५ करोड रुपैयाँ निक्षेप स्वरुप बैंकहरुमा जम्मा गरेका छन् । त्यसमा बीमा कम्पनीहरुले मात्र २ खर्ब २९ अर्ब १७ करोड रुपैयाँ जम्मा गरेका छन् ।
यस्तै, सरकारी कम्पनीहरुले रु. ३ खर्ब २७ अर्ब ३९ करोड निक्षेप संकलन गरेको तथ्यांकमा उल्लेख छ । यस्तै, गैर–सरकारी कम्पनीहरुले २ खर्ब ७५ अर्ब ६८ रुपैयाँ निक्षेप राखेका छन् ।
यसैगरि गैर नाफा मुलुक संस्थाहरु मार्फत रु. १ खर्ब २२ अर्ब १९ करोड, अन्तर बैंक निक्षेप मार्फत रु. १ खर्ब १ अर्ब ४१ करोड र विविध माध्यमबाट रु. ६३ अर्ब २६ करोड निक्षेप संकलन भएको छ ।
वि.सं.२०७७ असार ५ शुक्रवार ०९:३८ मा प्रकाशित