काठमाडौं । लामो समयको लकडाउनको प्रभावका कारण कुखुराको उत्पादन घट्दा कुखुराको मासुको मूल्य ह्वात्तै बढेको छ । लकडाउन भएपछिका केही दिनसम्म घटेको मासुको मूल्य त्यसयता निरन्तर बढेको र अझै बढ्न सक्ने पोल्ट्री व्यवसायीहरूको भनाइ छ ।
सरकारले कोरोना संक्रमण नियन्त्रणका लागि लकडाउन लगाएपछि कुखुरालाई खुवाइने दाना, दाना उत्पादनका लागि आवश्यक पर्ने कच्चा पदार्थ, चल्ला तथा तयारी कुखुरा ढुवानीमा अवरोध आएपछि अधिकांश किसानले कुखुरा पाल्न छाडेका थिए ।
त्यसैको प्रभाव स्वरूप अहिले एकातिर उत्पादन घट्न गएको छ भने अर्कोतिर लकडाउन खुकुलो भएयता मासुको मागमा वृद्धि हुँदा मूल्य बढ्न थालेको हो ।
लकडाउनका समयमा नयाँ उत्पादित चल्ला विक्री हुन नसक्दा ≈याचरी उद्योगले दैनिक ६ लाख चल्ला नष्ट गर्नुपरेको थियो । तर, अहिले बजार बिस्तारै चलायमान हुँदै जाँदा तयारी कुखुराको अभाव हुन गएकाले मासुको मूल्य बढेको नेपाल पोल्ट्री महासंघका महासचिव दिनेशराज मिश्रले बताए ।
लकडाउनका समयमा समग्र पोल्ट्री उद्योगको दैनिक नोक्सानी २२ करोड रुपैयाँसम्म पुगेको जनाउँदै मिश्रले बजार सहज हुँदै गएपछि नोक्सानीको मात्रामा समेत केही सुधार हुँदै गएको बताए ।
पछिल्लो समय मासुको मूल्य दिन प्रतिदिन बढिरहेको छ । वैशाख १६ गते प्रतिकिलो २५० रुपैयाँमा विक्री भइरहेको मासुको मूल्य वैशाख २४ गते २ सय ७० हुँदै २७ गतेसम्म ३०० रुपैयाँ पुगेको थियो ।
त्यसपछि जेठ महीनामा ३१० हुँदै ३५० बाट अहिले ३९० रुपैयाँ कायम भएको मासु व्यवसायी संघले जानकारी दिएको छ । ‘अबको केही हप्ताभित्रै मासुको मूल्य बढेर ४ ५० देखि ५ सयसम्म पुग्न सक्छ,’ मासु व्यवसायी संघका अध्यक्ष जंगबहादुर बीसीले भने ।
सामान्य अवस्थामा देशभरि दैनिक रूपमा ५ लाख किलो मासु खपत हुन्छ, जसमध्ये काठमाडौं उपत्यकामा मात्र साढे २ देखि ३ लाख किलो खपत हुने गर्छ ।
तयारी कुखुरा त निकै न्यून मात्रामा छन्, त्यसैले पहिल्यै कोल्डस्टोरमा राखिएको मासु विक्री भइरहेको व्यवसायीहरू बताउँछन् । लकडाउनका कारण कुखुरा किसानले नयाँ चल्ला हाल्न छाडेपछि ह्याचरी उद्योगहरूले दैनिक रूपमा ६ लाख चल्ला नष्ट गरेका थिए ।
अहिले चल्लाको माग केही बढेको देखिए तापनि पूर्णरूपमा बजार चल्न सकेको छैन । त्यसैले करीब ४० प्रतिशत किसानले मात्र खोरमा चल्ला हालेका छन् भने अझै पनि अधिकांश खोर खाली नै छन् ।
हप्तामा ४२ लाख चल्ला उत्पादन गर्ने ह्याचरीहरूले आफ्नो उत्पादन घटाउँदै प्रतिहप्ता करीब ३६ लाख मात्रै उत्पादन गरिरहेका छन् । आजको आर्थिक अभियान दैनिकमा समाचार प्रकाशित छ ।
वि.सं.२०७७ असार २१ आइतवार १०:३७ मा प्रकाशित