तनहुँ । व्यास नगरपालिकाले आफ्ना सटरमा राखिएका पसललाई २ महिनाको छुट गर्ने भएको छ । नगरपालिकाले व्यवसायीहरु कोरोना भाइरस संक्रमणको कारण मारमा परेको भन्दै चैत र वैशाखको भाडा छुट दिने निर्णय गरेको हो ।
व्यवसायीको अनुरोधमा भाडा छुट दिने प्रस्ताव भएको नगरपालिका प्रवक्ता मोहनकुमार श्रेष्ठले जानकारी दिनुभयो । प्रवक्ताश्रेष्ठका व्यवसायीलाई भाडा छुट दिने प्रस्ताव नगरसभामा पेश गर्ने निर्णय भएको छ । ‘प्रस्ताव नगरसभाबाट स्वीकृत भएपछि व्यावसायीले २ महिनाको भाडा छुट पाउने छन्’ उहाँले भन्नुभयो ।
नगरपालिकाले कार्यालयको नयाँ भवन र दमौली बजारमा सटर भाडामा लगाएको छ । नगरपालिकाको यो निर्णयबाट व्यवसायीले मासिक १३ लाखका दरले दुई महिनाको २६ लाख भाडा छुट पाउनेछन् । नगरपालिकाले नगरक्षेत्रभित्र घरभाडामा लगाउने घरधनीलाई पनि भाडाछुट दिन अनुरोध गरेको छ ।
कार्यपालिका बैठकले नगरभित्रका विकास आयोजना एवं प्राकृतिक स्रोत उपयोगका लागि वातावरणीय अध्ययन गर्न आवश्यक वातावरणीय परीक्षण एवं व्यवस्थापन ऐन, २०७७ नगरसभामा पेश गर्ने निर्णय गरेको छ । असार २५ गते ३३ औँ नगरसभा बस्दैछ ।
नगरपालिकाको बुद्धसिंह मार्गबाट निर्माण सामग्री ढुवानी गर्ने टिपर राति पनि हिँड्ने र शहरी क्षेत्रमा असुरक्षाको अवस्था सिर्जना भएको गुनासो आएकाले सवारीसाधनलाई साँझ ६ बजेदेखि ९ बजेसम्म मात्र बजार क्षेत्रका सडक बाहेक राजमार्गमा प्रवेश गर्न दिने निर्णय भएको नगरपालिकाले जनाएको छ ।
वि.सं.२०७७ असार २३ मंगलवार १४:४९ मा प्रकाशित