काठमाडौं । दुई दिनदेखि देशभर भएको वर्षात् र बाढीका कारण विद्युत् आयोजनामा क्षति पुग्दा करिब पाँच सय मेगावाट विद्युत् उत्पादन अवरुद्ध भएको छ ।
हालसम्म नेपाल विद्युत् प्राधिकरण मातहतका २४० मेगावाट र निजी क्षेत्रका २५० मेगावाट विद्युत् उत्पादन अवरुद्ध हुन पुगेको नेपाल विद्युत् प्राधिकरणले जनाएको छ । अहिले भारी वर्षाका कारण मुलुकका विभिन्न स्थानमा विद्युत् उत्पादन, प्रसारण र वितरण प्रणालीसमेत प्रभावित भएका छन् ।
सबैभन्दा ठूलो १४४ मेगावाटको कालीगण्डकी ‘ए’ विद्युत् गृह शुक्रबार बिहान ८ बजेबाट बन्द भएको छ । कालीगण्डकी नदीमा पानीको बहाव बढ्दै गएकाले विद्युत् गृह कतिबेला सञ्चालन गर्न सकिन्छ भन्ने निश्चित नभएको केन्द्र प्रमुख पशुपति गौतमले जानकारी दिए।
प्राधिकरणको स्वामित्वका ७० मेगावाटको मध्यमस्र्याङ्दी, १६ मेगावाटको त्रिशूली, १४ मेगावाटको देवीघाट विद्युत् गृह अहिले बन्द भएका छन् । निजी क्षेत्रको ४५ मेगावाटको माथिल्लो भोटेकोसीको उत्पादन पनि बन्द भएको छ ।
यस्तै इलामको सिद्धीथुम्कामा काबेली करिडोर प्रसारण लाइनमा क्षति पुग्दा यस लाइनमा जोडिएका विद्युत् आयोजनाको करिब १५० मेगावाट विद्युत् उत्पादन बन्द गर्नुपरेको प्राधिकरणले जनाएको छ । विभिन्न स्थानमा प्रसारण तथा वितरण लाइनको तार चुँडिने, रुख ढलेर लाइनमा क्षति पुग्दा विद्युत् आपूर्तिमा समस्या आइरहेको प्राधिकरणले जनाएको छ ।
स्वदेशी उत्पादन आकस्मिक रूपमा बन्द भएपछि कटैया र ढल्केवर हुँदै विद्युत् आयात गर्न लागिएको जनाइएको छ । प्राधिकरणका कार्यकारी निर्देशक कुलमान घिसिङका अनुसार बन्द भएका विद्युत् गृह, प्रसारण तथा वितरण लाइन यथाशीघ्र सञ्चालन गरी विद्युत् आपूर्ति व्यवस्थापन गर्न प्राविधिक टोली खटिइसकेको जानकारी दिनुभयो । उहाँका अनुसार केही स्थानमा न्यूनतम विद्युत् कटौती गरी आपूर्तिको व्यवस्थापन भइरहेको छ । गोरखापत्र दैनिकमा खबर छ ।
वि.सं.२०७७ असार २७ शनिवार ०८:३८ मा प्रकाशित