काठमाडौं । विश्व बैंकले विभिन्न परियोजनाको लागि नेपाललाई ४५ करोड अमेरिकी डलर अर्थात् करिब ५४ अर्ब रुपैयाँ ऋण सहयोग गर्ने भएको छ ।
विश्व बैंकले यातायात पूर्वाधारको क्षमताका साथै सुरक्षा सुधार, सीमापार व्यापार दक्षता अभिवृद्धि र रणनीतिक सडक सञ्जाल व्यवस्थापनका परियोजना सञ्चालनका ऋण उपलव्ध गराउने भएको हो ।
अर्थमन्त्रालय र बैंकबीच शुक्रबार ऋण सहयोग सम्झौतामा हस्ताक्षर भएको छ । अर्थमन्त्री डा युवराज खतिवडाको उपस्थितिमा सम्झौतामा सम्झौतापत्रमा अर्थसचिव शिशिरकुमार ढुङ्गानाले र नेपालका लागि विश्व बैंकका देशीय प्रबन्धक फारिस हदाद जर्भोसले हस्ताक्षर गर्नुभएको छ ।
मन्त्री खतिवडाले त्यस अवसरमा संक्षिप्त मन्तव्य व्यक्त गर्दै सीमापार व्यापार तथा सडक सञ्जाल विस्तारसँगै कोभिड–१९ पछिको आर्थिक पुनरुत्थानमा सघाउ पुग्ने विश्वास व्यक्त गर्नुभयो ।
उहाँले नेपालको आर्थिक वृद्धि, राष्ट्रिय एवं क्षेत्रीय एकीकरणमा परियोजनाबाट मद्दत मिल्ने र त्यसले दिगो आर्थिक विकास लक्ष्य हासिल गर्न सघाउ पुग्ने बताउनुभयो । बैंकले उपलब्ध गराउने रकम हालसम्मकै सबैभन्दा ठूलो ऋण सहायता हो ।
वि.सं.२०७७ साउन २ शुक्रवार २०:१६ मा प्रकाशित