काठमाडौं । अपांगता भएका व्यक्ति तथा एकल महिलाहरुले पाउँदै आएको सामाजिक सुरक्षा भत्ता नरोकिने भएको छ।
महिला बालबालिका तथा ज्येष्ठ नागरिक मन्त्री पार्वत गुरुङले सामाजिक सुरक्षा ऐन संशोधनको प्रक्रिया नटुंगिँदासम्म सो भत्ता स्थानीय तहबाट वितरण गर्ने आवश्यक अन्तरिम व्यवस्था गर्न गृह मन्त्रालयलाई पत्राचार गरिएको जानकारी दिएका छन्।
सामाजिक सुरक्षा ऐन २०७५ तथा सामाजिक सुरक्षा नियमावली २०७६ जारी हुँदा अति अशक्त भएका व्यक्ति तथा ६० वर्षमुनिका एकल महिला लाभग्राहीका रुपमा समावेश नहुँदा अन्योल थियो।
हाल स्थानीय तहहरुबाट नियमित रुपमा हुने लाभग्राही नवीकरण गर्दा उनीहरुको दर्ता तथा नवीकरणका लागि विवरण नलिएको भनी सरोकारवालाहरुले चासो व्यक्त गरेपछि आफ्नो ध्यानाकर्षण भएको मन्त्रालयले जनाएको छ।
वि.सं.२०७७ साउन ८ बिहीवार ०९:२४ मा प्रकाशित
