धनगढी । क्वारेन्टिनमा कार्यरत स्वास्थ्यकर्मीसहित तीन जनालाई कोरोना संक्रमण देखिएपछि कैलालीको कैलारी गाउँपालिकामा अनिश्चितकालका लागि लकडाउन गरिने भएको छ ।
बुधबार गाउँपालिकाको विपद् व्यवस्थापन समिति, इलाकाप्रहरी कार्यालय, सशस्त्र प्रहरीका बिओपी प्रमुख, बजारका प्रतिनिधि, नागरिक समाज र सबै वडाका अध्यक्षहरूको बैठकले बिहीबारदेखि अनिश्चितकालका लागि लकडाउन गर्ने निर्णय गरेको हो ।
क्वारेन्टिनमा बसेकासँगै स्वास्थ्यकर्मी, भान्से र चौकीदारमा पनि संक्रमण देखिँदाउनीहरूको सम्पर्कमा धेरै मान्छे आएको पाइएपछि बिहीबारदेखि अनिश्चितकालसम्मका लागि लकडाउन गर्ने निर्णय गरिएको गाउँपालिकाका अध्यक्ष लाजुराम चौधरीले बताए ।
लकडाउन अवधिमा बजार, वित्तीय संस्था बन्द हुने तथा भेला र भीडभाड गर्न नपाइने, अनिवार्य मास्क प्रयोग गर्ने, सामाजिक दूरी कायम गर्ने जस्ता कुरा पालना गर्ने निर्णय भएको अध्यक्ष चौधरीले जानकारी दिए ।
लकडाउनको पालना भए नभएको निगरानी स्थानीय प्रहरी प्रशासनले गर्ने तथा सुरक्षा सतर्कता अपनाएर लकडाउनमा सरकारी कार्यालय भने संचालन गरिने छ । यो गाउँपालिकामा संक्रमतिको संख्या ४८ जना रहेको छ । त्यसमध्ये ४१ जना निको भएका छन् भने ७ जना सक्रिय संक्रमित छन् ।
वि.सं.२०७७ साउन २२ बिहीवार ०८:४० मा प्रकाशित
