काठमाडौं । नेपाल आयल निगमका कर्मचारी ७/७ दिनको रोटेसन काममा आउनुपर्ने भएको छ । निगमका सबै कार्यालय तथा डिपोले सोहीअनुसारको ड्युटी रोस्टर बनाइ काम गर्ने भएका हुन् ।
देशमा कोभिड-१९ संक्रमण बढेको अवस्थामा निगमले सम्भावित जोखिम कम गर्न विभाग, कार्यालय तथा डिपोले कमभन्दा कम कर्मचारीमार्फत काम गर्नेगरी ड्युटी रोस्टर बनाउने भएका हुन् ।
निगमको योजना, प्रशासन तथा मान संसाधन विकास विभागले आफू मातहत सबै कार्यालयलाई गरेको परिपत्रमा ती कार्यालयले रोस्टर बनाएर आफूलाई जानकारी गराउन उल्लेख छ ।
कोभिड-१९ बाट बच्न निगमको सेवा निरन्तर सञ्चालन गर्न भन्दै निगम व्यवस्थापनबाट यस्तो निर्णय गरेको हो । विभागले जारी गरेको परिपत्रमा सात दिन कार्यालय आउने र सात दिन नआउने व्यवस्था गर्न उल्लेख छ ।
निगमका कार्यकारी निर्देशक सुरेन्द्रकुमार पौडेलले भने, “निकै कठिन समय आएको छ । यस्तोमा इन्धनको आपूर्ति व्यवस्था बिथोलिन नदिन निगमलाई ठूलो चुनौती छ ।” उनका अनुसार निगमको कोर अपरेसनको काम गर्न सक्ने सयजना मात्र कर्मचारी छन् । ती सबै फिल्डमा हुन्छन् । र, उनीहरूलाई संक्रमण देखिए मुख्य अपरेसनको कामै ठप्प हुन्छ ।
उनले भने, “डिप लिने, गुणस्तर कायम गर्ने कामजस्ता पूर्ण प्राविधक काम अर्को व्यक्तिबाट गराउन सकिँदैन । त्यसकारण आपूर्ति बिथोलिन सक्छ ।” पौडेलले ७/७ दिनमा पीसीआर परीक्षण गर्दा कोभिड-१९ को संक्रमणको संकेत देखिने र सोहीअनुसार व्यवस्थापन गर्न सकिने भएकाले ७/७ दिनको रोटेसनका लागि निर्देश गरिएको बताए । -बाह्रखरीबाट
वि.सं.२०७७ साउन २७ मंगलवार ११:२४ मा प्रकाशित