काठमाडौं । ग्लोबल आईएमई बैंक लिमिटेडका नवनियुक्त प्रमुख कार्यकारी अधिकृत (सीईओ) रत्नराज बज्राचार्यले पदभार ग्रहण गर्नुभएको छ । बैंकमा आयोजित एक कार्यक्रमबीच बज्राचार्यले पदभार ग्रहण गर्नुभएको छ ।
पदभार ग्रहण गर्नुअघि बैंकका अध्यक्ष चन्द्रप्रसाद ढकालले उहाँले पद तथा गोपनियताको सपथ गराउनुभएको थियो । कार्यक्रममा अध्यक्ष ढकालले ग्लोबल आईएमईले अब्बल बैंकर बज्राचार्यलाई दोस्रो कार्यकालका लागि पाएको बताउनुभयो ।
यसअघि बैंक मर्जर र मर्जरपछिको व्यवस्थापनमा उनले खेलेको भूमिका सराहनीय रहेको ढकालले बताउनुभयो । अबका दिनमा पनि बैंकलाई देशकै सबैभन्दा उत्कृष्ट र सबल बैंकको रुपमा स्थापित गर्न उहाँको भूमिका रहने ढकालको भनाई थियो ।
पदभार ग्रहण पछि सीईओ बज्राचार्यले ग्लोबल आईएमई बैंकमा जनता बैंक गाभिई बनेको देशकै ठूलो बैंकको नेतृत्व गर्न पाउनु आफूलाई चुनौति र अवसर दुवै रहेको बताउनुभयो । उहाँले बैंकलाई थप मजबुत बनाउँदै बैंकको सेवालाई सरल र सहज बनाउने चुनौति आफ्नो सामु रहेको बताउनुभयो ।
उहाँले मर्जरपछि धेरैजसो सूचकहरुमा ग्लोबल आइएमई बैंक देशकै ठूलो र एउटा उत्कृष्ट बैंकको रुपमा रहेको भन्दै यसलाई थप उचाइमा पुर्याउने र यसको सेवालाई ७७ वटै जिल्लामा विस्तार गरी सबैका लागि बैैंक भन्ने मूल नारालाई साकार पार्ने बताउनुभयो ।
वि.सं.२०७७ भदौ १ सोमवार १६:३५ मा प्रकाशित
