काठमाडौ । नेपाल धितोपत्र बोर्डले जनरल इन्स्योरेन्स कम्पनी नेपाललाई आईपीओ निष्कासन गर्न अनुमति दिएको छ । कम्पनीलाई ३० लाख कित्ता आईपीओ विक्री गर्न भदौ २४ गते बोर्डले अनुमति दिएको हो ।
नयाँ निर्जीवन बीमा कम्पनीको रुपमा सञ्चालित यस कम्पनीले बीमा समितिले तोके बमोजिम चुक्तापूँजी कायम गर्न आईपीओ निष्कासन गर्न लागेको हो ।
आईपीओ निष्कासनका लागि कम्पनीले गत असार ५ गते बोर्डमा निवेदन दर्ता गराएको थियो । हाल संस्थापकतर्फको रू. ७० करोड चुक्तापूँजी रहेको यस कम्पनीको आईपीओ निष्कासन पश्चात रू. १ अर्ब चुक्तापूँजी कायम हुनेछ ।
आईपीओ निष्कासन पश्चात यस कम्पनीमा सर्वसाधारणतर्फको ३० प्रतिशत र संस्थापकतर्फ ७० प्रतिशत शेयर स्वामित्व कायम हुनेछ । आईपीओ विक्री प्रवन्धकको जिम्मेवारी एनआईबिएल एस क्यापिटल लिमिटेडले पूरा गर्नेछ ।
वि.सं.२०७७ भदौ २५ बिहीवार १५:०५ मा प्रकाशित
