काठमाडौं । बैंक अफ काठमाण्डूले यो वर्षको नगद लाभांश पारित गरेको भोलिपल्ट देखिनै वितरण गर्न शुरु गरेको छ ।
कम्पनीले मंसिर १५ गते सम्पन्न २६औं वार्षिक साधारण सभामार्फत १३ प्रतिशत बोनस शेयर र कर प्रयोजन समेत २ दशमलव ९९ प्रतिशत नगद लाभांश प्रस्ताव पारित गरेको थियो ।
बैंकले नगद लाभांश मंसिर १६ गतेदेखिनै बैंक खाता अद्यावधिक भएका शेयरधनीहरुको हकमा खातामै जम्मा गरिदिएको हो । हालसम्म पनि शेयर अभौतिकीकरण नगराएका र बैंक खाता अद्यावधिक नगरेको शेयरधनीहरुको हकमा भने सबै प्रकृया पूरा गरेपश्चात नगद खातामा जम्मा गरिने समेत कम्पनीले बताएको छ ।
साथै, आफ्नो शेयर धितो राखी कर्जा लिएकाहरुले भने उक्त कम्पनीबाट धितो राखेको शेयरको संख्या समेत खुल्ने गरी नो अब्जेक्सन लेटर र बुक क्लोज पछाडी कर्जा चुक्ता गरेकाहरुले नगद लाभांश फुकुवा गरी शेयर रजिष्ट्रारको कार्यालयमा पेश गर्नुपर्ने कम्पनीको भनाइ छ ।
कम्पनीको शेयर रजिष्ट्रारमा बिओके क्यापिटल मार्केट लिमिटेड रहेको छ । बोनस शेयर भने सूचीकरण प्रकृयामा जाने हुँदा समय लाग्ने बैंकले जानकारी दिएको छ ।
वि.सं.२०७७ मंसिर २८ आइतवार १३:४८ मा प्रकाशित
