बागलुङ । आदर्श सञ्चार सहकारी संस्था लिमिटेड बागलुङको सदस्य भेटौ: सदस्य सुनौ अभियान अन्तरगत काठेखोला गाउँपालिका वडा नं. ३ धम्जामा शनिवार वडा भेला सम्पन्न भएको छ ।
भेलाले शान्ति भण्डारी संयोजक र बाबुराम भण्डारी सचिव रहेको वडा स्तरीय उप–समिति गठन गरेको छ । उप–समितिका सदस्यहरुमा राम बहादुर भण्डारी, गोपाल श्रीस, याम बहादुर थापा, सुन्तली विश्वकर्मा, सन्त बहादुर आले, खुम बहादुर खड्का र गणेश खड्का रहनु भएको छ ।
संस्थाको रणनीतिक योजना अनुसार बागलुङ जिल्लाका सबै वडामा उप–समिति गठन गरी सदस्य विस्तार अभियान गर्ने उदेश्यले वडा स्तरीय उप–समिति गठन गरिएको संस्थाले जनाएको छ ।
आदर्श सञ्चार सहकारी संस्थाको योजना, कार्यक्रम र वडा स्तरीय उप–समितिको काम कर्तव्य र अधिकार लगायतका विषयमा संस्थाका सम्पादक राम बहादुर जिसीले जानकारी गराउनुभएको थियो ।
बागलुङ जिल्ला कार्यक्षेत्र रहेको संस्थाले जिल्लाका ८५ वटै वडामा वडा स्तरीय उपसमिति गठन गरी संस्थाको रणनीतिक योजना अनुसारका कार्यक्रम सञ्चालन गरिने उहाँले जानकारी दिनुभयो ।
संस्थाका अध्यक्ष हुमा कुमारी जिसी (अञ्जु) ले वडा स्तरीय उप–समितिका पदाधिकारी तथा सदस्यहरुलाई वधाई तथा शुभकामना व्यक्त गर्दै संस्थाको योजना पुरा गर्नका लागि सक्रियताका साथ काम गर्न सुझाव दिनुभएको थियो ।
भेलामा संस्थामा आवद्ध नयाँ शेयर सदस्यहरुलाई स्वागत गरिएको थियो । वडा भेलामा २५ जना नया शेयर सदस्य थप भएको संस्थाका प्रवन्धक दिपकराज सापकोटाले जानकारी दिनुभयो ।
धौलागिरीको पहिलो सञ्चार सहकारीका रुपमा स्थापित आदर्श सञ्चार सहकारी संस्थामा हाल २ हजार ३ सय २५ जना शेयर सदस्य, ४ करोड ८० लाख शेयर रकम, ३३ करोड बचत, २९ करोड कर्जा लगानी र कुल सम्पती ४० करोड रहेको संस्थाका कोषाध्यक्ष पूर्ण बहादुर कार्कीले जानकारी दिनुभयो ।
वि.सं.२०७७ पुस १९ आइतवार १६:३८ मा प्रकाशित
