काठमाडौँ । संस्कृति पर्यटन तथा नागरिक उड्डयन मन्त्री भानुभक्त ढकालले अनएराइभल भिसा र कोभिड खोप लगाइसकेका पर्यटकलाई निर्बाध रुपमा नेपाल प्रवेश गर्न दिने गृहकार्य भइरहेको बताउनुभएको छ ।
संस्कृति पर्यटन तथा नागरिक उड्डयन मन्त्रालय सिंहदरबारमा आज आयोजित सञ्चारकर्मीहरूसँगको अन्तरक्रिया कार्यक्रममा मन्त्री ढकालले कोभिडका कारण थला परेको पर्यटन क्षेत्रलाई उकास्न आन्तरिक र बाह्य दुवै खाले पर्यटनलाई बढवा दिन आवश्यक नीतिको तर्जुमा गरिने बताउनुभयो ।
मन्त्री ढकालले कोभिड कारण निमार्ण हुन नसकेका निमार्णाधिन विमानस्थलको समयमै कार्य सम्पन्न गर्न सरकार प्रतिबद्ध रहेको बताउनुभयो । अर्को प्रसङ्गमा मन्त्री ढकालले लोकतान्त्रिक पद्धतिमा जनादेशमा जाने प्रक्रियालाई अन्यथा व्याख्या गर्न नहुने बताउनुभयो ।
अन्तरक्रियामा सहभागी विभिन्न सञ्चार संस्थासँग आबद्ध पत्रकारहरूले पर्यटन प्रवर्द्धनका लागि राय सुझाव दिँदै मन्त्रालयले सूचना अद्यावधिक गर्ने र सूचना दिने कुरामा ढिला सुस्ती गर्न नहुने बताउनुभयो ।
वि.सं.२०७७ माघ १६ शुक्रवार १५:३३ मा प्रकाशित
